“Monsa” A Seriya yo‘llanmasi uchun kechgan pley-off finalida “Piza”ni ikki o‘yin natijasiga ko‘ra mag‘lub etdi.
Shu tariqa Silvio Berluskoniga tegishli jamoa Italiyaning yuqori divizioniga yo‘llanmani qo‘lga kiritdi.
B Seriyaning 2021/22-yilgi mavsumida jamoalar 67 ochkodan jamg‘arib, uchinchi va to‘rtinchi pog‘onalarni egallagan edi. Ikkala jamoa ham pley-offning yarim final bosqichidan o‘tib, finalda to‘qnash keldi va unda “Monsa” g‘alaba qozondi.
Jamoalar o‘rtasidagi dastlabki uchrashuvda 2:1 hisobida “Monsa”ning qo‘li baland kelgandi. Javob o‘yinida “Piza” 3:2 hisobida ustun keldi. Qo‘shimcha bo‘limlarda “Monsa” futbolchilari yana 2 ta gol urib, o‘z tarixida ilk bor A Seriyaga yo‘l oldi.
Shu tariqa Berluskoni klubi ilk bor Italiyaning yuqori divizioniga yo‘l oldi. Avvalroq “Lechche” va “Kremoneze” A Seriya yo‘llanmasiga ega chiqqandi. “Kalyari”, “Jenoa” va “Venetsiya” 2021/22-yilgi mavsum yakunlariga ko‘ra, B Seriyaga ravona bo‘lgan.
Italiyaning sobiq bosh vaziri va “Milan”ning sobiq rahbari Silvio Berluskoni 2018-yildan buyon “Monsa”ni boshqarib keladi. Funksioner 2017-yilda “Milan”ni xitoyliklarga sotib yuborgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)