“Real” va “Ayntraxt” Yevropa Superkubogida o‘ynaydi, jamoalar 62 yildan so‘ng ilk bor to‘qnash keladi

Finlyandiyaning Xelsinki shahridagi Olimpiya stadionida 10-avgust kuni Yevropa Superkubogi doirasida “Real” va “Ayntraxt” o‘zaro to‘qnash keladi.

Madrid klubi Chempionlar Ligasi g‘olibi sifatida ishtirok etadi. Karlo Anchelotti shogirdlari 28-may kuni “Liverpul” ustidan g‘alaba qozonib, YChL bosh sovrinini qo‘lga kiritdi.

“Ayntraxt” esa Yevropa Ligasi chempioni hisoblanadi. Nemis klubi 18-may kuni “Reynjers”ni mag‘lub etib, shohsupaga ko‘tarildi.

“Ayntraxt” va “Real” 1959/60-yildan beri rasmiy o‘yinlarda bir-biriga to‘qnash kelmagan edi. O‘shanda “qaymoqranglilar” frankfurtliklarni Yevropa Chempionlar Kubogi finalida 7:3 hisobida mag‘lubiyatga uchratgan. Uchrashuvda Alfredo di Stefano het-trik qayd etgan bo‘lsa, Ferens Pushkash pokerga erishgan.