“Grunt qiroli” amaldagi chempionga qarshi. Rafael Nadal va Novak Jokovich Rolan Garrosning chorak finalidayoq o‘zaro to‘qnash keladi

Fransiyaning Parij shahrida tennis bo‘yicha “Ulkan toj” turkumiga kiruvchi Golan Garros—2022 musobaqasi davom etmoqda.

29-may kuni musobaqaning 1/8 finalidan o‘rin olgan to‘rtta o‘yin bo‘lib o‘tdi. Jahonning birinchi raqamli tennischisi Novak Jokovich argentinalik Diyego Shvarsmanni mag‘lub etib (6:1, 6:3, 6:3), chorak finalga yo‘l oldi. Jokovich yarim final yo‘llanmasi uchun 31-may kuni ispaniyalik Rafael Nadalga qarshi kortga chiqadi. Nadal 1/8 finalda Kanada vakili Feliks Oje-Alyassimni besh set natijasiga ko‘ra (3:6, 6:3, 6:2, 3:6, 6:3), mag‘lubiyatga uchratdi.

ATP reytingida uchinchi pog‘onada borayotgan Aleksandr Zverev chorak finalda yil kashfiyoti sifatida e’tirof etilayotgan 19 yoshli ispaniyalik raketkachi Karlos Alkaras bilan bahs yuritadi.

Shu tariqa, Nadal va Jokovich 59-marta o‘zaro to‘qnash keladigan bo‘ldi. Shu vaqtda qadar Novak 30 marta g‘alaba qozongan bo‘lsa, Rafa 28 bor raqibidan ustun kelgan. Biroq gruntli kortlarda Nadal katta ustunlik bilan oldinda — 19:8.

Ma’lumot uchun, Jokovich va Nadal Rolan Garros—2021 chorak finalida ham o‘zaro duch kelib qolgandi. Unda serbiyalik tennischining qo‘li baland kelgan. Novak finalda Stefanos Sisipasni yengib, musobaqa g‘olibiga aylangandi.

Avvalroq Nadal “Ulkan toj”dagi 300-g‘alabasini qo‘lga kiritib, bu borada Jokovich va Rojer Federerning natijasini takrorlagani xabar qilingandi.