Sadio Mane yozda “Liverpul”ni tark etadi. Futbolchi boshqa jamoa bilan shaxsiy shartnoma borasida kelishib olgan

“Liverpul” vingeri Sadio Mane yozda jamoasini o‘zgartiradi.

Senegallik futbolchi yangi chaqiriqlarga tayyor. “Liverpul” buni rasman tasdiqlaydi, deya xabar beradi jurnalist Fabrisio Romano.

“Bavariya” Mane uchun jiddiy da’vogar bo‘lib turibdi. Ammo hozircha yakuniy qaror qabul qilingani yo‘q. Sadio Chempionlar Ligasi finalidan oldin qarorini e’lon qilishni xohlamagan.

AS nashrining ma’lumotiga ko‘ra, “Real”ga qarshi YChL finalidan so‘ng futbolchi “Liverpul” bilan xayrlashgan. “Muxlislar va murabbiyga barchasi uchun rahmat demoqchiman. Jamoaga eng yaxshi tilaklarni tilab qolaman”, — deb aytib o‘tgan Sadio.

Mane “Bavariya” bilan shaxsiy kelishuvga erishdi, deb yozadi Nikolo Skira. Tomonlar o‘rtasidagi bitim 3 yilga mo‘ljallangan. Myunxenliklar futbolchi uchun 30 million yevro taklif qilmoqchi. Ammo “qizillar” Maneni qimmatroqqa sotishni mo‘ljallamoqda.

Sadio Mane 2016-yildan buyon “Liverpul” sharafini himoya qilib keladi. U jamoa bilan birgalikda Chempionlar Ligasi, Angliya chempionati, Angliya Kubogi, Liga Kubogi, Yevropa Superkubogi va klublar o‘rtasidagi Jahon chempionatini qo‘lga kiritgan.