Силвио Берлусконига тегишли жамоа ўз тарихида илк бор А Серия йўлланмасини қўлга киритди

«Монца» А Серия йўлланмаси учун кечган плей-офф финалида «Пиза»ни икки ўйин натижасига кўра мағлуб этди.

Шу тариқа Силвио Берлусконига тегишли жамоа Италиянинг юқори дивизионига йўлланмани қўлга киритди.

B Сериянинг 2021/22 йилги мавсумида жамоалар 67 очкодан жамғариб, учинчи ва тўртинчи поғоналарни эгаллаган эди. Иккала жамоа ҳам плей-оффнинг ярим финал босқичидан ўтиб, финалда тўқнаш келди ва унда «Монца» ғалаба қозонди.

Жамоалар ўртасидаги дастлабки учрашувда 2:1 ҳисобида «Монца»нинг қўли баланд келганди. Жавоб ўйинида «Пиза» 3:2 ҳисобида устун келди. Қўшимча бўлимларда «Монца» футболчилари яна 2 та гол уриб, ўз тарихида илк бор А Серияга йўл олди.

Шу тариқа Берлускони клуби илк бор Италиянинг юқори дивизионига йўл олди. Аввалроқ «Лечче» ва «Кремонезе» А Серия йўлланмасига эга чиққанди. «Кальяри», «Женоа» ва «Венеция» 2021/22 йилги мавсум якунларига кўра, B Серияга равона бўлган.

Италиянинг собиқ бош вазири ва «Милан»нинг собиқ раҳбари Силвио Берлускони 2018 йилдан буён «Монца»ни бошқариб келади. Функционер 2017 йилда «Милан»ни хитойликларга сотиб юборганди.