Butun dunyoda oziq-ovqat mahsulotlari bilan bog‘liq vaziyat yomonlashmoqda. Tahlilchilarga ko‘ra, bug‘doy zaxiralari 10 haftada yetadi. Qishloq xo‘jaligi vazirligi G‘allachilik va dukkakli don ekinlari boshqarmasi boshlig‘i o‘rinbosari Abdulla Mansurov O‘zbekiston bunday vaziyatga qanaqa tayyorgarliklar ko‘rib qo‘ygani to‘g‘risida ma’lumot berdi.
Uning so‘zlariga ko‘ra, aholi don va un taqchilligidan xavotirlanmasa ham bo‘ladi, mamlakat nafaqat don mustaqilligiga erishgan, balki uni eksport ham qiladi.
“2020-yilda respublika bo‘yicha o‘rtacha hosildorlik gektaridan 57 sentnerni tashkil etgan bo‘lsa, 2021-yilda 64 sentnerga yetdi. 2022-yilda esa gektaridan 70 sentner don olishni rejalashtirib turibmiz. Bunday hosildorlikning ortishi yangi navlarning, uni ekishga ajratiladigan yer maydonlarining oshishi hisobiga amalga oshyapti. Avvallari g‘alla urug‘liklari asosan davlat korxonalari, don mahsulotlari institutlari tomonidan chetdan olib kelinardi. Mana o‘tgan yili klaster, fermer xo‘jaliklari tomonidan 2,8 ming tonnadan ortiq urug‘lik don olib kelindi va ularni ekish maydonlari kengaytirildi”, — deydi Mansurov.
Ekspertning aytishicha, o‘zbek fermerlari tritikale navlarini ham olib kelishgan. Ushbu g‘alla navi hosili va somoni mo‘lroq bo‘lgani uchun aholi iste’moliga yanada ko‘proq foyda keltiradi.
“Yana shuniyam aytish kerakki, maydonlarning kengayishi, hosildorlikni ortgani hisobiga respublikada o‘tgan yildagi don zaxirasi 2022-yilning avgust oyigacha yetarli. Iyun oyida esa dalalarimizdan 7 million tonnadan ortiq g‘allaning yangi hosilni yig‘ishtirib olamiz. Ushbu hosil o‘tgan yildagidan 1 million tonnadan ortiq bo‘lishi rejalashtirilmoqda. Respublikamiz aholisi iste’moli va boshqa ehtiyojlari uchun 5,5 million tonna don yetarli bo‘ladi. Yana 2 million tonna ortiq don yetishtirish chorva, parranda, baliqni ham oziqlantirishga va bu don orqali boshqa sohalarning rivojlanishiga olib keladi”, — deya ta’kidlaydi u.
Avvalroq O‘zbekistonga yil boshidan beri Qozog‘istondan 1,1 mln tonna bug‘doy import qilingani to‘g‘risida xabar berilgandi.
Izoh (0)