Rossiya prezidenti Vladimir Putin 28-may kuni Germaniya kansleri Olaf Shols va Fransiya prezidenti Emmanuel Makron bilan telefon orqali muloqot qildi.
G‘arb yetakchilari bu safar ham Putinni zudlik bilan o‘t ochishni to‘xtatishga, Ukrainadan qo‘shinlarini olib ketishga va Vladimir Zelenskiy bilan to‘g‘ridan to‘g‘ri muzokaralarni boshlashga chaqirdi, deyiladi Germaniya va Fransiya tomonlarining bayonotida.
Makron va Shols Putindan Mariupoldagi “Azovstal” zavodini tark etib, Rossiya harbiylari tomonidan asirga olingan 2500 nafarga yaqin ukrainalik askarni ozod qilishni so‘ragan.
Shuningdek, Germaniya va Fransiya rahbarlari Ukraina donini Qora dengiz orqali eksport qilishni boshlash va global oziq-ovqat inqirozining oldini olish uchun Odessa qamalini zudlik bilan olib tashlashni talab qilgan.
Kremlning muzokaralar haqidagi hisobotiga ko‘ra, Vladimir Putin Rossiya harbiylari Ukrainada xalqaro gumanitar qonunlarga qat’iy amal qilayotganini aytgan. Shu bilan birga, u “G‘arbning Ukrainaga qurol jo‘natishda davom etishi” tufayli “vaziyatning yanada beqarorlashishi va gumanitar inqirozning kuchayishi xavfi” haqida ogohlantirdi.
“Global oziq-ovqat xavfsizligi masalasida esa Rossiya prezidenti G‘arb davlatlarining noto‘g‘ri iqtisodiy va moliyaviy siyosati, shuningdek, Rossiyaga qarshi qo‘llagan sanksiyalari natijasida kelib chiqqan oziq-ovqat ta’minoti bilan bog‘liq qiyinchiliklarning asl sabablarini aniq ma’lumotlarga asoslanib tushuntirdi”, — deyiladi Kreml hisobotida.
Mavzuga doir:
- “Tinchlikka hech qanday umid ko‘rmadim” — Italiya bosh vaziri Dragi Putin bilan suhbati haqida
- Makron Putin bilan suhbatda Ukrainadagi operatsiyalarning “juda og‘ir” oqibatlarga olib kelishini ma’lum qildi
- FT: Putin Kiyev bilan tinchlik shartnomasi tuzishga qiziqishini yo‘qotgan, endi u Ukrainaning imkon qadar ko‘proq hududini egallamoqchi
Izoh (0)