Ukraina prezidenti Vladimir Zelenskiy Xarkov viloyatidagi ukrainalik harbiylarning oldingi pozitsiyalari (jangovar harakatlar ketayotgan hudud)ga tashrif buyurdi. Bu haqda 29-may Ukraina prezidenti ofisi xabar qildi.
Reuters xabariga ko‘ra, bu Ukraina prezidentining urush boshlanganidan beri Kiyev viloyatidan tashqariga birinchi rasmiy safari.
“Zelenskiy harbiy xizmatchilarga davlat mukofotlari va qimmatbaho sovg‘alar topshirdi, shuningdek, Ukraina himoyachilari bilan suhbatlashdi”, — deyiladi xabarda.
Zelenskiy viloyat ma’muriyati rahbari Oleg Sinegubov, Xarkov meri Igor Terexov va boshqa rahbarlar bilan ham uchrashgan. Sinegubovning aytishicha, urush mobaynida mintaqada 2229 ta ko‘p qavatli uy u yoki bu tarzda vayron bo‘lgan, Xarkovda esa, uy joy fondining 30 foizdan ortig‘i shikastlangan.
Uchrashuv davomida Zelenskiy “butun mamlakat bo‘ylab, ayniqsa vayron qilingan hududlardagi panel uylarni olib tashlash imkoniyatlarini ko‘rib chiqish”ni hamda vayron bo‘lgan uylar o‘rniga yerto‘lalari va bomba boshpanalari bor “zamonaviy uy joylar” qurishni taklif qilgan.
May oyi o‘rtalarida Xarkov uchun jangda Ukraina g‘olib bo‘lgani ma’lum qilingandi. Rossiya kuchlari viloyat hududidan chekingan. 24-may kuni Xarkovda ikki oy davomida shahar aholisi uchun bomba boshpanasi vazifasini o‘tagan metro qayta ishga tushdi.
Izoh (0)