AQSHning Oklaxoma shtati Taft shahrida ochiq osmon ostida o‘tkazilgan festivaldagi otishmada bir kishi halok bo‘lib, yetti kishi yaralandi. Bu haqda Associated Press xabar bermoqda. Otishmani uyushtirishda gumonlanayotgan 26 yoshli erkak qo‘lga olindi.
Mahalliy politsiya ma’lumotlariga ko‘ra, 39 yoshli ayol o‘ldirilgan, yana yetti kishi jarohatlar olgan. Jabrlanganlar orasida bir nafar voyaga yetmagan shaxs bor. Xotira kuniga bag‘ishlangan festivalda 1,5 ming kishi qatnashgan. Shaharning o‘zida esa bor-yo‘g‘i bir necha yuz kishi yashaydi.
Xotira kuni — AQSHda milliy xotirlash bayrami bo‘lib, u Amerika ishtirok etgan barcha urush va qurolli nizolarda halok bo‘lgan amerikalik harbiylar xotirasiga bag‘ishlangan.
Eslatib o‘tamiz, AQSHda avvalroq Yuvald shahridagi boshlang‘ich maktabda otishma yuz bergan edi. Maktabning sobiq o‘quvchisi, 18 yoshli Salvador Ramos 19 nafar bolani va ikki o‘qituvchini otib tashladi va qo‘lga olinish chog‘ida o‘zi ham halok bo‘ldi.
Hodisadan keyin Jamoat xavfsizligi bo‘yicha Texas departamenti direktori, polkovnik Stiven Makkrou ma’lum qilishicha, politsiyachilarga rahbarlik qilgan politsiya bo‘limi boshlig‘i Ramos bino ichida barrikada qurib olgani va endi bolalar xavf ostida emasligini ta’kidlagan. Shu sababli u politsiyachilarga shiddatli hujumga tayyorlanish uchun vaqt berishga qaror qilgan. Makkrou ushbu qarorni noto‘g‘ri deb hisoblaydi. Holat bo‘yicha tekshiruv AQSH Adliya vazirligi tomonidan boshlab yuborildi.
Izoh (0)