Namanganda sel kelishi sabab boshqaruvni yo‘qotgan avtomobil yo‘l chetidagi to‘siqqa urildi

Namangan viloyati Pop tumaniga 30-may kuni sel keldi. Bu haqda viloyat Favqulodda vaziyatlar boshqarmasi xabar qildi.

Qayd etilishicha, bunga Namangan hududida yomg‘ir yog‘ishi sabab bo‘lgan.

Jumladan, shu kuni soat 12:25 larda Chortkesar adirliklarida kuchli yomg‘ir yog‘gan. Pop—Pardatursun yo‘lining 12-kilometrida suv o‘tkazish galareyasiga suv sig‘may qolgan. Oqibatda avtomobillardan biri yo‘l chetidagi to‘siqlarga urilib, buzib yuborgan.

Hozirda tuman FVB tomonidan sodir bo‘lgan sellar oqibatini bartaraf etish ishlari olib borilmoqda.

Bundan tashqari, 30-may kuni Namangan viloyatiga yomg‘ir yog‘ishi oqibatida Chust tumani Axcha qishlog‘ini Pop tumani Uyg‘ursoy shaharchasi bilan adirlar orasini bog‘lovchi ichki yo‘lga sel kelishi kuzatilgan. Oqibatda avtomobil yo‘llarini suv bosgan.

Avvalroq Pop tumanida avvaliga do‘l yog‘ib, keyin sel kelgani, Chortoqda mahallani bog‘lab turuvchi ko‘prikni sel oqizib ketgani, Namanganda kuchli yomg‘ir ko‘prikni qisman yemirib yuborgani to‘g‘risida xabar berilgandi.