Jizzax viloyatida bo‘ri bolalari 200 dollarga sotilayotgani haqida xabarlar tarqaldi. Davlat ekologiya qo‘mitasi matbuot xizmati holat yuzasidan surishtiruv-o‘rganish ishlari olib borilganini ma’lum qildi.
Viloyat Ekologiya va atrof-muhitni muhofaza qilish boshqarmasining bioxilma-xillikni asrash, raqamlashtirish va kadastr yuritish bo‘limi xodimlari tomonidan Baxmal tumani IIB bilan hamkorlikda surishtiruv-o‘rganish ishlari natijalaridan ma’lum bo‘lishicha, Baxmal tumanida istiqomat qiluvchi T.X. va J.M. ismli fuqaro 3 ta bo‘ri bolasini ushlab, ularni sotish bo‘yicha ijtimoiy tarmoq sahifalariga joylagan.
Tezkor nazorat reyd tadbirida fuqaro X.T.ning o‘ziga tegishli bo‘lgan avtomashina yukxonasida 3 ta bo‘ri bolasi borligi aniqlangan va ashyoviy dalil sifatida olingan. Huquqbuzarlarning har biriga Ma’muriy javobgarlik to‘g‘risidagi kodeksning 90-moddasi, 1-qismiga asosan jarima qo‘llanilgan.
“Ayni vaqtda bo‘ri bolalari ekologlar tomonidan parvarish qilinmoqda. Ob-havoning qulay bo‘lgan vaqtida ularni ushlangan joyiga olib borib, tabiat qo‘yniga qo‘yib yuborish rejalashtirilmoqda. Bu haqda yana qo‘shimcha ma’lumot beriladi”, — deyiladi qo‘mita xabarida.
Izoh (0)