Ijtimoiy tarmoqlarda Qashqadaryo viloyatining Dehqonobod tumanidagi ekin maydonlarini chigirtka to‘dasi bosgani aytilgan video tarqaldi. Dehqonobod tumani hokimligi mazkur holat haqida ma’lumot berdi.
Aniqlanishicha, video tumanning “Otqamar” mahalla fuqarolar yig‘inida tasvirga olingan.
“Telegram messenjeridagi kanallarda Dehqonobod tumanidagi ekin maydonlarini chigirtkalar bosgani aytilgan video tarqaldi. Mazkur holat mas’ullar tomonidan o‘rganib chiqildi. Viloyat Favqulodda vaziyatlar boshqarmasi, viloyat o‘simliklar karantini va himoyasi boshqarmasi hamda uning tarkibidagi chigirtka va tut parvonasiga qarshi kurashish xizmati xodimlari tuman hokimligi mas’ullari bilan birga o‘rganish ishlarini olib bordi”, — deyiladi hokimlik ma’lumotida.
Mutaxassislar Turkmanistondan kirib kelgan chigirtkalar besh yoshga to‘lgani, ko‘payish va oziqlanish davri tugaganligi tufayli aholi tomorqalariga, qishloq xo‘jaligiga zarar keltirmasligini bildirgan.
“Vaziyatni hududga borib o‘rgandik. Mutaxassislar tomonidan surishtiruv ishlari olib borildi. Aniqlanishicha, shamol oqimi tufayli qo‘shni Turkmaniston Respublikasidan kichkina chigirtkalar to‘dasi kirib kelgan. Ammo ushbu to‘da besh yoshga to‘lgan, ko‘payish va oziqlanish davri tugaganligi tufayli aholi tomorqalariga, qishloq xo‘jaligiga zarar keltirmaydi”, — dedi tuman hokimi o‘rinbosari Baxtiyor Berdiyev.
Izoh (0)