Наманган вилояти Поп туманига 30 май куни сел келди. Бу ҳақда вилоят Фавқулодда вазиятлар бошқармаси хабар қилди.
Қайд этилишича, бунга Наманган ҳудудида ёмғир ёғиши сабаб бўлган.
Жумладан, шу куни соат 12:25 ларда Чорткесар адирликларида кучли ёмғир ёғган. Поп—Пардатурсун йўлининг 12-километрида сув ўтказиш галареясига сув сиғмай қолган. Оқибатда автомобиллардан бири йўл четидаги тўсиқларга урилиб, бузиб юборган.
Ҳозирда туман ФВБ томонидан содир бўлган селлар оқибатини бартараф этиш ишлари олиб борилмоқда.
Бундан ташқари, 30 май куни Наманган вилоятига ёмғир ёғиши оқибатида Чуст тумани Ахча қишлоғини Поп тумани Уйғурсой шаҳарчаси билан адирлар орасини боғловчи ички йўлга сел келиши кузатилган. Оқибатда автомобиль йўлларини сув босган.
Аввалроқ Поп туманида аввалига дўл ёғиб, кейин сел келгани, Чортоқда маҳаллани боғлаб турувчи кўприкни сел оқизиб кетгани, Наманганда кучли ёмғир кўприкни қисман емириб юборгани тўғрисида хабар берилганди.
Изоҳ (0)