Jahon sog‘liqni saqlash tashkiloti (JSST) maymunchechak bilan kasallanish bo‘yicha 257 ta holat tasdiqlangani va 120 ta holat shubha ostida ekani haqida xabar berdi. 13-maydan buyon kasallik dunyoning 23 davlatida aniqlangan, deyiladi JSSTning 29-maydagi hisobotida.
Jumladan, Fransiya oliy sog‘liqni saqlash boshqarmasi mamlakatda maymunchechak bilan kasallangan kishilar soni 16 nafarga yetganini ma’lum qildi.
Xabar qilinishicha, bemorlarning aksariyati — 12 kishi Ile-de-Frans metropoliyasida, bir nafari sharqiy Overn—Rona—Alp mintaqasida, ikki nafari Oksitaniyada va yana bir nafari Normandiyada.
Shu bilan birga, boshqarma bayonotida aytilishicha, Yevropada maymunchechak bilan kasallanish holatlari yengil bo‘lib qolmoqda. O‘lim qayd etilmagan.
Jahon sog‘liqni saqlash tashkiloti maymunchechakka qarshi ommaviy emlashga ehtiyoj yo‘qligini ta’kidlagan edi. Kontaktni kuzatish va bemorlarni izolyatsiya qilish infeksiya tarqalishining oldini olishda asosiy usullar hisoblanadi. Emlash, xuddi chechak kasalligida bo‘lgani kabi, faqat maymunchechak virusi bilan ishlaydigan laboratoriya xodimlari, shuningdek, bunday infeksiya bilan kasallangan bemorlarni davolovchi shifokorlar uchun tavsiya etiladi.
Maymunchechak yuqumli kasallik bo‘lib, birinchi marta Afrikada 1958-yilda aniqlangan. 2003-yilda u bilan kasallanish Qo‘shma Shtatlarda qayd etilgan. Oxirgi yirik epidemiya 2017-yilda Nigeriyada sodir bo‘lgan, ammo 2018—2019-yillarda Buyuk Britaniya, Isroil va Singapurda ham maymunchechak kasalligi aniqlangan.
2022-yilning may oyi boshida ushbu kasallikka chalinish holatlaridan biri haqida Buyuk Britaniya rasmiylariga xabar qilindi. Nigeriyadan qaytgan erkakda maymunchechak aniqlangan. Keyin kasallikning o‘choqlari Avstraliya, Belgiya, Kanada, Fransiya, Germaniya, Italiya, Niderlandiya, Portugaliya, Ispaniya, Shvetsiya, Buyuk Britaniya, AQSH, Irlandiya, Chexiya va Sloveniyada kuzatildi.
Belgiya maymunchechak tufayli majburiy karantin joriy etgan birinchi davlat bo‘ldi
Izoh (0)