Turkiya sog‘liqni saqlash vaziri Fahriddin Koja mamlakatda niqob taqish majburiyati bekor qilinganini e’lon qildi. Bu haqda u Twitter’da yozgan.
“Niqoblar endi majburiy emas, shifoxonalarda taqish bundan mustasno. Lekin o‘tgan shuncha tajribadan so‘ng, odam gavjum yopiq joylarda, ayniqsa jamoat transportida foydalanish uchun o‘zimiz bilan niqob olib yurishimiz mumkin”, — deb yozadi Koja.
U mazkur qarorini koronavirus bilan kasallanishlar sonining keskin kamayishi bilan izohladi — ketma-ket uch kun davomida Turkiyada 1 mingdan kam odamda virus aniqlangan.
Turkiyada oxirgi sutka davomida 922 kishida COVID-19 qayd etildi, kasallikdan uch kishi vafot etdi, deya xabar bermoqda Anadolu agentligi Turkiya Sog‘liqni saqlash vazirligiga tayanib. Turkiyaning 57,83 milliondan ortiq aholisi koronavirusga qarshi vaksinaning birinchi dozasini olgan, 53,05 milliondan ortiq kishi to‘liq emlangan.
Turkiyada COVID-19 bilan kasallanishning birinchi holati 2020-yil 11-martda aniqlangan, 26-mart kuni esa mamlakatda 1,1 mingdan ortiq holat qayd etilgandi. Turkiya fuqarolari orasida 2022-yilda kunlik kasallanishning maksimal soni (4-fevral kuni) 111 mingga yaqinlashdi. Mamlakatda majburiy niqob taqish tartibi 2020-yilning may oyida 25 ta viloyatda joriy qilingan. Qoidalarni buzganlar jarimaga tortilgan.
2021-yil aprel oyida Turkiya prezidenti Rajab Toyyib Erdo‘g‘on mamlakatda to‘liq lokdaun joriy qildi. Uzoq masofalarga sayohat qilish uchun cheklovlar qo‘yildi, maktablarda kunduzgi ta’lim to‘xtatildi, bolalar bog‘chalari yopildi, jamoat transportida bandlikni 50 foizdan oshirmaslik talabi qo‘yildi, aksariyat muassasalar yopildi.
Izoh (0)