Nazarboyev Qozog‘iston konstitutsiyasidan o‘zi haqidagi bandlar olib tashlanishini qo‘llab-quvvatlaydi

Qozog‘iston sobiq prezidenti Nursulton Nazarboyev konstitutsiyaga kiritiladigan, u yerdan uning huquqiy maqomi va vakolatlari haqidagi moddani olib tashlaydigan tuzatishlarni qo‘llab-quvvatlaydi. Bu haqda Nazarboyev siyosatshunos Daniyar Ashimbayevga bergan intervyusida ma’lum qildi, deb yozadi “RBK”.

“5-iyun kuni menga konstitutsiya tomonidan taqdim etilgan huquqimdan albatta foydalanaman va referendumda ovoz beraman. Men doim ta’kidlab kelganmanki, mamlakatning Bosh qonuni qotib qolgan huquqiy relikt emas, balki jonli mexanizm, u Qozog‘iston jamiyati hayotini aks ettiradi, unda yuz berayotgan o‘zgarishlarni ko‘rsatib beradi”, — dedi Nazarboyev.

Uning fikricha, har bitta avlod konstitutsiyaga o‘zgartirishlar kirita olishi mumkin, agar bu “davrning zarur talabi bo‘lsa va progressga, jamiyatning demokratik rivojlanishiga imkoniyat yaratsa”.

Sobiq prezident 2019-yilda Qozog‘iston aholisining katta qismi uni qo‘llab-quvvatlaganiga qaramay davlat rahbari lavozimidan ketganini eslatdi, biroq “siyosiy tranzit silliq kechishi hamda jamiyatdagi va hukmron elitadagi ehtimoliy ziddiyatlarni yumshatish uchun” vakolatlarining bir qismini qoldirganini qayd etdi.

Nazarboyev vakolatlar prezident Qosim-Jo‘mart To‘qayevga berilganidan keyin yangi davlat rahbarini va uning islohotlarini doim qo‘llab-quvvatlab kelganini qo‘shib qo‘ydi. “Bu safar ham qo‘llab-quvvatlashimga shubha qilmasangiz ham bo‘ladi”, — dedi u.

To‘qayev aprel oyida Qozog‘iston konstitutsiyasiga o‘zgartirishlar kiritish bo‘yicha referendum o‘tkazilishini e’lon qilgandi. O‘zgartirishlar mamlakat bosh qonunining 30 dan ortiq moddalariga taalluqli bo‘ladi. Boshqa narsalar qatorida Qozog‘istonning birinchi prezidenti Nursulton Nazarboyevning vakolatlari va maqomi to‘g‘risidagi bandlar konstitutsiyadan chiqarib tashlanishi rejalashtirilmoqda. Qozog‘istonning amaldagi konstitutsiyasiga muvofiq, uning birinchi prezidenti lavozimda o‘tkazgan davrda amalga oshirgan barcha harakatlari uchun to‘liq va muddatsiz daxlsizlikka egadir.

2022-yil yanvar oyida Qozog‘istonda gaz narxi oshishiga qarshi norozilik namoyishlari bilan boshlangan yirik tartibsizliklar bo‘lib o‘tdi. Ularni bostirish uchun To‘qayev, xususan, KXSHT mamlakatlari qurolli kuchlarini taklif qildi. Noroziliklar fonida Qozog‘istonning birinchi prezidenti Nursulton Nazarboyev Xavfsizlik Kengashi rahbari lavozimidan chetlashtirildi, uning ko‘plab qarindoshlari rahbarlik lavozimlaridan ayrildi.

Nursulton Nazarboyev 1990-yildan 2019-yilgacha Qozog‘iston SSRni, keyin esa mustaqil Qozog‘istonni boshqargan. Prezidentlikdan ketgach, u Qozog‘iston Xavfsizlik kengashi rahbari vakolatlarini saqlab qolgandi.