31-may kuni ertalab Yerda meteor yomg‘iriga guvoh bo‘lish mumkin, meteorlar soni soatiga 10 mingtagacha yetishi mumkin. Bu haqda astronom Aleksandr Yakushechkinga tayanib, “RBK” xabar bermoqda.
“Yuqori meteor faollik taxminan ikki soat davom etishi mumkin, uning avj nuqtasi, hisob-kitoblarga ko‘ra, 06:30 ga (Toshkent vaqti bilan 08:30) to‘g‘ri keladi, bu paytda bizning uzunliklarimizda allaqachon tong bo‘ladi”, — dedi Yakushechkin.
Uning so‘zlariga ko‘ra, meteor oqimi Yerning G‘arbiy yarim sharida, Shimoliy Amerikada eng yaxshi ko‘rinadi. Astronomning vaqt bo‘yicha aniqlik kiritishicha, yomg‘ir qachon boshlanishi borasida bir nechta versiyalar bor, u Toshkent vaqti bilan 10:00 ga yaqin boshlanishi ham mumkin.
Meteorlar asosan kuchsiz va xira bo‘ladi, bu meteoroidlar va zarralarning atmosferaga kirish tezligi kichik bo‘lishi bilan bog‘liq, dedi Yakushechkin.
Bundan tashqari, Yer orbitasini SW3 kometasi bo‘laklarining ikkita shleyfi ham kesib o‘tadi, bu hodisa esa asosiy meteor yomg‘iridan bir necha soat avvalroq yuz beradi. Shu sababli, ekspert fikricha, 30-maydan 31-mayga o‘tar kechasi meteor yomg‘irini ko‘rish imkoniyati rossiyaliklarda ham bo‘ladi.
Osmon jismlari Yer atmosferasiga kirib, yonib ketganida yuz beradigan yorug‘lik hodisasi meteor deyiladi. Yorqinroq meteorlar bolidlar deb ataladi. Yer yuzasigacha uchib kelgan osmon jismi esa meteorit deyiladi.
Izoh (0)