Toshkent shahrida ijaradagi uyida “Poker” o‘yinlarini tashkil etgan xorijlik fuqarolar ushlandi. Bu haqda IIV xabar berdi.
Ma’lum qilinishicha, DXX, Ichki ishlar vazirligi va Toshkent shahar Ichki ishlar bosh boshqarmasi tomonidan hamkorlikda tezkor tadbir o‘tkazilgan. Olingan tezkor ma’lumot asosida 1999-yilda tug‘ilgan chet el fuqarosi Rent car mas’uliyati cheklangan jamiyati rahbari ijaradagi uyida tavakkalchilikka asoslangan “Poker” o‘yinlarini tashkil etgan.
U Toshkentga kelgan 9 nafar chet el fuqarosi bo‘lgan tanishlarini o‘yinga jalb qilib, qimor o‘tkazayotgan vaqtida ushlandi. Voqea joyidan poker stoli, 36 ta poker o‘yini kartalari, 15 ming dollar, 6 mln 784 ming so‘m miqdoridagi pullar, uchta o‘q otar qurol, 193 ta 12 kalibrli patronlar, qo‘l kishani, 2 ta elektroshoker, 105 ta bug‘u shoxlari, oq ayiq terisi va kallasi ashyoviy dalil sifatida hujjatlashtirib olindi.
Yakkasaroy tumani Bog‘idil ko‘chasida o‘tkazilgan tezkor tadbirda esa 1991-yilda yana bir chet el fuqarosi 11 nafar shaxsni to‘plab “Poker” o‘yinlarini tashkil qilgani aniqlandi. Ular poker stoli atrofida qo‘lga olindi.
Holatlar yuzasidan jinoyat ishlari qo‘zg‘atilib, tergov harakatlari olib borilmoqda.
Bundan avval Raqobat qo‘mitasi bukmekerlik xizmatlarini reklama qilgan vaynerlarga tegishli choralar ko‘rilganini ma’lum qilgandi. “Reklama to‘g‘risida”gi qonunga ko‘ra, mamlakat hududida qimor o‘yinlari va tavakkalchilikka asoslangan boshqa o‘yinlarni reklama qilish taqiqlanadi. Bunday faoliyatni reklama qilish tegishli javobgarlikka sabab bo‘ladi. Raqobat qo‘mitasi 2024-yil va 2025-yilning to‘rt oyida 185 ta holatda totalizatorlik va bukmekerlik idoralari faoliyatiga oid reklamalarda kamchiliklarni aniqlagan.
Izoh (0)