Жаҳон соғлиқни сақлаш ташкилоти (ЖССТ) маймунчечак билан касалланиш бўйича 257 та ҳолат тасдиқлангани ва 120 та ҳолат шубҳа остида экани ҳақида хабар берди. 13 майдан буён касаллик дунёнинг 23 давлатида аниқланган, дейилади ЖССТнинг 29 майдаги ҳисоботида.
Жумладан, Франция олий соғлиқни сақлаш бошқармаси мамлакатда маймунчечак билан касалланган кишилар сони 16 нафарга етганини маълум қилди.
Хабар қилинишича, беморларнинг аксарияти — 12 киши Иле-де-Франц метрополиясида, бир нафари шарқий Оверн—Рона—Алп минтақасида, икки нафари Окситанияда ва яна бир нафари Нормандияда.
Шу билан бирга, бошқарма баёнотида айтилишича, Европада маймунчечак билан касалланиш ҳолатлари енгил бўлиб қолмоқда. Ўлим қайд этилмаган.
Жаҳон соғлиқни сақлаш ташкилоти маймунчечакка қарши оммавий эмлашга эҳтиёж йўқлигини таъкидлаган эди. Контактни кузатиш ва беморларни изоляция қилиш инфекция тарқалишининг олдини олишда асосий усуллар ҳисобланади. Эмлаш, худди чечак касаллигида бўлгани каби, фақат маймунчечак вируси билан ишлайдиган лаборатория ходимлари, шунингдек, бундай инфекция билан касалланган беморларни даволовчи шифокорлар учун тавсия этилади.
Маймунчечак юқумли касаллик бўлиб, биринчи марта Африкада 1958 йилда аниқланган. 2003 йилда у билан касалланиш Қўшма Штатларда қайд этилган. Охирги йирик эпидемия 2017 йилда Нигерияда содир бўлган, аммо 2018—2019 йилларда Буюк Британия, Исроил ва Сингапурда ҳам маймунчечак касаллиги аниқланган.
2022 йилнинг май ойи бошида ушбу касалликка чалиниш ҳолатларидан бири ҳақида Буюк Британия расмийларига хабар қилинди. Нигериядан қайтган эркакда маймунчечак аниқланган. Кейин касалликнинг ўчоқлари Австралия, Бельгия, Канада, Франция, Германия, Италия, Нидерландия, Португалия, Испания, Швеция, Буюк Британия, АҚШ, Ирландия, Чехия ва Словенияда кузатилди.
Бельгия маймунчечак туфайли мажбурий карантин жорий этган биринчи давлат бўлди
Изоҳ (0)