Twitter ijtimoiy tarmog‘i asoschilaridan biri va sobiq rahbari Jek Dorsi yangi Sun Day nomli ilovani ishlab chiqdi. Dastur geolokatsiyaga qarab quyoshda qancha vaqt xavfsiz yurish mumkinligini baholaydi va tanangiz olishi mumkin bo‘lgan D vitamini miqdorini hisoblab beradi.
Ilova foydalanuvchining joylashuvini aniqlab, o‘sha hududdagi ultrabinafsha (UV) nurlanish indeksi hamda quyosh chiqishi davomiyligini ko‘rsatadi.
Foydalanish tartibi juda oddiy. Dastlab ilovada teringiz turini va ustingizdagi kiyim qanchalik ochiqligini belgilaysiz. So‘ng ko‘chaga chiqqanda “Boshlash” tugmasini bosasiz. Shunda ilova sessiyani ishga tushiradi va sizga taxminiy D vitamini miqdorini xalqaro birliklarda hisoblab beradi.
Shuningdek, Sun Day ilovasi Burn Limit deb nomlangan ko‘rsatkichga ham ega. Bu foydalanuvchining ochiq havoda yana qancha vaqt yurishi mumkinligini bildiradi hamda teri kuyishining oldini olish uchun cheklovlar beradi.
Bu Dorsi tomonidan so‘nggi paytda ishlab chiqilgan ikkinchi dasturiy mahsulotdir. Bir necha kun avval u Bitchat nomli internetga ulanmasdan ishlaydigan, shifrlangan messenjerni ham ommaga taqdim etgan edi. Har ikki loyiha Goose nomli sun’iy intellekt yordamida ishlab chiqilgan.
Sun Day hozircha faqat iOS tizimida mavjud. Uni o‘rnatish uchun avval TestFlight dasturini yuklab olish kerak. Shundan so‘ng Sun Day ilovasini o‘rnatish mumkin. Android versiyasi hozircha ishlab chiqilmagan.
Izoh (0)