Ukrainaning Rossiya armiyasi tomonidan katta qismi ishg‘ol qilingan Zaporojye viloyati “yangi hokimiyati” hududda qo‘sh valyutali zonani joriy qildi. Bu haqda Zaporojye “harbiy-fuqarolik boshqaruvi bosh kengashi” a’zosi Vladimir Rogov “RIA Novosti”ga ma’lum qildi.
“To‘lovlarni grivnada ham, rublda ham amalga oshirish mumkin. Barcha nafaqalar rublda beriladi”, — dedi Rogov.
Uning qo‘shimcha qilishicha, viloyatning “yangi hokimiyati” Rossiyaga qo‘shilish yo‘lidan boradi. Bu “hudud Ukraina millatchilaridan to‘liq ozod qilinganidan keyin” sodir bo‘ladi.
“Zaporojye viloyati uchun kelajak faqat bitta bo‘lishi mumkin — u Rossiyaning bir qismi bo‘lishi kerak, Rossiya Federatsiyasining to‘laqonli subyektiga aylanishi zarur”, — dedi Rogov.
Shuningdek, u Zaporojye viloyatining “ozod qilingan” qismiga Rossiya imperiyasi davridagi gerb qaytarilganini aytdi.
23-may kuni, xuddi Zaporojye singari Rossiya armiyasi tomonidan bosib olingan Xerson viloyatining rossiyaparast “ma’muriyati” rahbari Vladimir Saldo viloyatda qo‘sh valyuta zonasi rasman joriy etilganini e’lon qilgandi.
Rossiya OAVlarida Xerson viloyatining yangi “harbiy-fuqarolik ma’muriyati” rahbari o‘rinbosari deb aytiladigan faol Kirill Stremousov hududning Rossiya tarkibiga kirmoqchiligini e’lon qilgan. Shu bilan birga, u “hech qanday referendumlar bo‘lmasligini” aytgan. Kreml esa viloyat aholisi “o‘z taqdirini o‘zi belgilashi” kerakligini ta’kidlagan.
Izoh (0)