AQSH Tayvan hududida mudofaani kuchaytirishga qaratilgan “jayra” strategiyasini amalga oshirmoqchi, bundan maqsad potensial tajovuzkorning harbiy xarajatlarini oshirish, deb yozadi The New York Times AQSH hukumatidagi manbalarga tayanib.
Aniqlik kiritilishicha, AQSH rasmiylari Xitoyga Tayvanga qarshi ehtimoliy hujumni rejalashtirayotgan davlat sifatida qaramoqda, shu sababli Tayvan armiyasi assimetrik urush olib borish uchun qurollantirilmoqda.
Nashrning anonim suhbatdoshlariga ko‘ra, Tayvan mudofaa tizimini har tomonlama qayta qurish va AQSH harbiylarining respublikadagi harbiy ishtirokini kengaytirishga Ukrainadagi urush sabab bo‘lgan. Mazkur urush AQSH rasmiylariga kichik armiyaning nisbatan katta armiya tomonidan olib boriladigan keng ko‘lamli harbiy operatsiyalariga dosh bera olish qobiliyatini namoyish etdi, deb yozadi nashr.
NYT manbalariga ko‘ra, AQSH qisman tan olingan Tayvan hududida o‘z mavjudligini oshirish orqali “to‘xtatib turish va provokatsiya o‘rtasidagi nozik chiziqni tortishga” harakat qilmoqda. Ularning tushuntirishicha, AQSh hukumati Tayvanni Xitoy bilan yuzaga kelishi mumkin bo‘lgan mojaroda razvedka ma’lumotlari bilan ta’minlash, shuningdek, unga F-16 qiruvchi samolyotlari, kemaga qarshi raketalar va jangovar dronlarni sotish niyatida.
23-may, dushanba kuni AQSH prezidenti Jo Bayden Xitoy bosqini yuz bergan taqdirda Qo‘shma Shtatlar Tayvanni harbiy yo‘l bilan himoya qilishga tayyorligini aytdi. Baydenning Tayvan va Qo‘shma Shtatlar o‘rtasidagi diplomatik yaqinlashuvdan dalolat beruvchi bayonotlari va Amerika tomonining boshqa harakatlariga javoban, Xitoy hukumati AQSHga “qat’iy norozilik” bildiradi va Amerika tomonining “Yagona Xitoy siyosati” tamoyillariga rioya qilish bo‘yicha majburiyatlarini eslatadi. Ushbu tamoyillarda AQSH Tayvanni tan olmasligi va u bilan diplomatik aloqalar o‘rnatmasligi aytilgan.
Izoh (0)