АҚШ Тайван ҳудудида мудофаани кучайтиришга қаратилган «жайра» стратегиясини амалга оширмоқчи, бундан мақсад потенциал тажовузкорнинг ҳарбий харажатларини ошириш, деб ёзади The New York Times АҚШ ҳукуматидаги манбаларга таяниб.
Аниқлик киритилишича, АҚШ расмийлари Хитойга Тайванга қарши эҳтимолий ҳужумни режалаштираётган давлат сифатида қарамоқда, шу сабабли Тайван армияси ассиметрик уруш олиб бориш учун қуроллантирилмоқда.
Нашрнинг аноним суҳбатдошларига кўра, Тайван мудофаа тизимини ҳар томонлама қайта қуриш ва АҚШ ҳарбийларининг республикадаги ҳарбий иштирокини кенгайтиришга Украинадаги уруш сабаб бўлган. Мазкур уруш АҚШ расмийларига кичик армиянинг нисбатан катта армия томонидан олиб бориладиган кенг кўламли ҳарбий операцияларига дош бера олиш қобилиятини намойиш этди, деб ёзади нашр.
NYT манбаларига кўра, АҚШ қисман тан олинган Тайван ҳудудида ўз мавжудлигини ошириш орқали «тўхтатиб туриш ва провокация ўртасидаги нозик чизиқни тортишга» ҳаракат қилмоқда. Уларнинг тушунтиришича, АҚШ ҳукумати Тайванни Хитой билан юзага келиши мумкин бўлган можарода разведка маълумотлари билан таъминлаш, шунингдек, унга F-16 қирувчи самолётлари, кемага қарши ракеталар ва жанговар дронларни сотиш ниятида.
23 май, душанба куни АҚШ президенти Жо Байден Хитой босқини юз берган тақдирда Қўшма Штатлар Тайванни ҳарбий йўл билан ҳимоя қилишга тайёрлигини айтди. Байденнинг Тайван ва Қўшма Штатлар ўртасидаги дипломатик яқинлашувдан далолат берувчи баёнотлари ва Америка томонининг бошқа ҳаракатларига жавобан, Хитой ҳукумати АҚШга «қатъий норозилик» билдиради ва Америка томонининг «Ягона Хитой сиёсати» тамойилларига риоя қилиш бўйича мажбуриятларини эслатади. Ушбу тамойилларда АҚШ Тайванни тан олмаслиги ва у билан дипломатик алоқалар ўрнатмаслиги айтилган.
Изоҳ (0)