DSQ aprel oyi uchun keshbek 25-maydan keyin tasdiqlanishini ma’lum qildi

Endi keshbek cheklar ro‘yxatdan o‘tkazilgan oydan keyingi oyning 25-sanasidan keyin tasdiqlanadi. Bu haqda Davlat soliq qo‘mitasi xabar berdi.

O‘zbekistonda 2022-yil 1-yanvardan QR kodli xarid cheklarini “Soliq” mobil ilovasida ro‘yxatdan o‘tkazgan jismoniy shaxslar xarid summasidan 1 foizlik keshbekka ega bo‘lmoqda. Xususan, iste’molchilarga yil boshidan beri qaytarilgan keshbeklar miqdori 72,3 mlrd so‘mga yetgan.

Sotib olingan tovarlar qaytarilganda tadbirkorlik subyektlarida xarid cheklariga tuzatish kiritish imkoniyati mavjudligi va ular tomonidan soliq hisobotlarini taqdim etish muddatlari hisobot oyidan keyingi oyning 20-sanasigacha etib belgilanganini inobatga olgan holda, keshbek summasi 21—25-sanalarda qaytarilishi ma’lum qilingandi. Ya’ni, yanvar uchun fevral oyining 21—25-sanalarida, fevral uchun esa mart oyining 21—25-sanalarida keshbek qaytarilishi bildirilgan.

Endilikda esa keshbek cheklar ro‘yxatdan o‘tkazilgan oydan keyingi oyning 25-sanasidan keyin tasdiqlanadi. Xususan, aprel oyi uchun qaytarilishi kerak bo‘lgan keshbek 25-maydan keyin tasdiqlanadi.

Ma’lumot uchun, to‘lov terminali orqali qabul qilingan to‘lovlar uchun xaridorlarga to‘lov terminali cheki bilan birga onlayn nazorat kassa mashinasi yoki virtual kassa cheki ham berilishi shart.