“Sportdagi natijalar yaratilgan sharoitlarga hali mos emas” — Shavkat Mirziyoyev

Shavkat Mirziyoyev raisligida 23-may kuni sportni ommalashtirish, sport ta’limini yaxshilash va iqtidorli sportchilarni tayyorlash bo‘yicha yig‘ilish boshlandi. Bu haqda prezident matbuot kotibi xabar qildi.

Qayd etilishicha, so‘nggi besh yilda sportni rivojlantirishga qariyb 4 trillion so‘m yo‘naltirilgan. 118 ta yangi yirik sport obyekti foydalanishga topshirilgan. 10 ta obyekt rekonstruksiya qilingan.

2022-yilda sport sohasiga 2 trillion 300 milliard so‘m (2017-yildan 5 baravarga ko‘p), shundan sport ta’lim muassasalari uchun 1 trillion 200 milliard so‘m ajratilgan. Ilk bor barcha mahallalardagi yoshlar yetakchilari, maktablarning jismoniy tarbiya o‘qituvchilari va sport maktablari trenerlari ishtirokida yoshlarni sportga jalb etish bo‘yicha yangi besh bosqichli musobaqalarga start berilgan. Aprel—may oylarida musobaqalar bilan 3 milliondan ziyod yoshlar qamrab olingan.

“Lekin sportdagi natijalar yaratilgan sharoitlarga hali mos emas”, — degan davlat rahbari.