Shavkat Mirziyoyev raisligida 23-may kuni o‘tkazilgan yig‘ilishda sport maktablari bilan olimpiya zaxiralari kollejlari va oliy sport mahorati maktablari o‘rtasida seleksiya borasida uzviy zanjir yo‘lga qo‘yilmagani qayd etildi. Bu haqda prezident matbuot kotibi xabar qildi.
Ma’lum qilinishicha, respublikadagi 279 ta bolalar va o‘smirlar sport maktabining 190 tasida 36 ta olimpiya sport turidan bor-yo‘g‘i 10 tasi o‘rgatiladi. Oqibatda xalqaro musobaqalarda qatnashish uchun davlat barcha tashkiliy va moliyaviy sharoitlarni yaratib berayotganiga qaramasdan, Osiyo va jahon olimpiya sporti bo‘yicha chempionatlarida 5—6 nafardan sovrindor chiqmoqda, xolos.
6 ta oliy sport mahorati maktabi, 32 ta olimpiya sport federatsiyasi olimpiya zaxiralari kollejlari bilan ishlashni o‘z holiga tashlab qo‘ygan. Kollejlardagi 9 mingga yaqin sportchilarning 21 foizigina milliy terma jamoaga kira olgan.
“Vaholanki, milliy terma jamoa tarkibini aynan shu kollejlardan chiqqan sportchilar tashkil etishi kerak emasmi? Bu masala qaysi viloyat hokimini qiynayapti?
Birorta viloyat, tuman yoki shahar hokimi sportning barcha turlari bo‘yicha tizimli ishlashni yo‘lga qo‘ya olgani yo‘q”, — degan prezident.
Izoh (0)