Rossiya 40 nafar fransiyalik diplomatni mamlakatdan chiqarib yuborishi mumkin

Fransiyaning Rossiyadagi elchisi Pyer Levi bugun, 18-may kuni Rossiya Tashqi ishlar vazirligiga chaqirildi, deb xabar beradi “Kommersant”.

“RIA Novosti”ga vazirlikdagilar ma’lum qilishicha, elchiga Fransiyadan rossiyalik diplomatlar chiqarib yuborilishiga javob choralari e’lon qilingan. Rossiyadan 40 nafar fransiyalik diplomat haydab yuborilishi kutilmoqda. Elchi TIVda 40 daqiqacha bo‘lib turgan, so‘ng jurnalistlarning savollarini javobsiz qoldirgan holda jo‘nab ketgan.

4-aprelda Fransiya TIV ko‘plab rossiyalik diplomatlarning mamlakatdan chiqarib yuborilishini e’lon qilgandi. “Bu Yevropa vaziyatga bildirayotgan munosabatning bir qismi bo‘lgan harakat. Eng birinchi majburiyatimiz fransuzlar va yevropaliklar xavfsizligini ta’minlash”, — deyilgan o‘shanda Fransiya TIV e’lon qilgan bayonotda.

Fransiya OAV o‘shanda gap 30-35 nafar rossiyalik diplomatning chiqarib yuborilishi haqida ketayotgani xususida xabar bergan. Zaxarova esa Moskvaning ushbu “surgunlar”ga “munosib javob” berishini aytgandi.

Keyinroq Fransiya Rossiya maxsus xizmatlarining “sirli operatsiyasi” fosh bo‘lgani tufayli yana 6 nafar rossiyalik diplomat mamlakatdan chiqarib yuborilishini e’lon qildi.

Shuningdek, 18-may kuni Rossiya TIVga Ispaniya elchisi ham chaqirilgan, bu ham rossiyalik diplomatlarning qirollikdan chiqarib yuborilishi bilan bog‘liq bo‘lgan choradir.

5-aprel kuni Ispaniya hukumati elchixonaning mamlakat “manfaatlari va xavfsizligiga xavf tug‘diruvchi” 25 nafar xodimini chiqarib yuborishga qaror qilgandi. TIV vakili Mariya Zaxarova o‘shanda “tegishli javob choralari” ko‘rilishini va’da qilgan, ammo shu paytgacha bunday chora-tadbirlar qo‘llanmagan edi.