NATO bosh kotibi Yens Stoltenberg 18-may kuni Bryusselda Finlyandiya va Shvetsiya elchilaridan ushbu mamlakatlarning alyansga a’zo bo‘lish haqidagi arizalarini qabul qilib oldi, deb yozadi Meduza.
Ikkala mamlakat ham Rossiyaning Ukrainaga bostirib kirishi fonida betaraflik maqomidan voz kechib, harbiy alyansga qo‘shilishga qaror qildi.
17-may kuni Shvetsiyaning NATOga kirish haqidagi arizasini mamlakat tashqi ishlar vaziri Ann Linde imzoladi. Shu kuniyoq Finlyandiya parlamenti alyansga qo‘shilish haqidagi qarorni 188 ta rozilik va sakkizta qarshilik ovozi bilan ma’qulladi.
Arizalar NATO kengashi tomonidan ko‘rib chiqiladi, shundan keyin Shvetsiya va Finlyandiyaning alyansga a’zo bo‘lishi haqidagi bitim unga a’zo 30 ta davlat tomonidan ratifikatsiya qilinishi kerak bo‘ladi.
Turkiya hukumati Shvetsiya va Finlyandiyaning NATOga qo‘shilishiga rozilik berish uchun o‘z shartlarini e’lon qildi. Xususan, ikki mamlakat Kurdiston ishchilar partiyasini va unga aloqador tuzilmalarni terrorchilik tashkiloti deb tan olishini talab qilmoqda. Shuningdek, Turkiya F-16 qiruvchi samolyotlarining yangi partiyasini qo‘lga kiritishga hamda yana F-35 qiruvchilarini yetkazib berish dasturiga kirishga umid qilmoqda.
Mavzuga doir:
- “Turkiya Shvetsiya va Finlyandiyaning NATOga kirishini ma’qullamaydi, ularning diplomatlari bizni ishontirishga urinmasa ham bo‘ladi” — Rajab Toyyib Erdo‘g‘on
- Shvetsiya va Finlyandiya NATOga qo‘shilish qarori haqida rasman e’lon qildi
- Finlyandiya Rossiya tomonidan xavf ko‘rmayapti, NATOga qo‘shilish istagi xavfsizlik sohasidagi o‘zgarishlar tufaylidir
Izoh (0)