Франциянинг Россиядаги элчиси Пьер Леви бугун, 18 май куни Россия Ташқи ишлар вазирлигига чақирилди, деб хабар беради «Коммерсантъ».
«РИА Новости»га вазирликдагилар маълум қилишича, элчига Франциядан россиялик дипломатлар чиқариб юборилишига жавоб чоралари эълон қилинган. Россиядан 40 нафар франциялик дипломат ҳайдаб юборилиши кутилмоқда. Элчи ТИВда 40 дақиқача бўлиб турган, сўнг журналистларнинг саволларини жавобсиз қолдирган ҳолда жўнаб кетган.
4 апрелда Франция ТИВ кўплаб россиялик дипломатларнинг мамлакатдан чиқариб юборилишини эълон қилганди. «Бу Европа вазиятга билдираётган муносабатнинг бир қисми бўлган ҳаракат. Энг биринчи мажбуриятимиз французлар ва европаликлар хавфсизлигини таъминлаш», — дейилган ўшанда Франция ТИВ эълон қилган баёнотда.
Франция ОАВ ўшанда гап 30-35 нафар россиялик дипломатнинг чиқариб юборилиши ҳақида кетаётгани хусусида хабар берган. Захарова эса Москванинг ушбу «сургунлар»га «муносиб жавоб» беришини айтганди.
Кейинроқ Франция Россия махсус хизматларининг «сирли операцияси» фош бўлгани туфайли яна 6 нафар россиялик дипломат мамлакатдан чиқариб юборилишини эълон қилди.
Шунингдек, 18 май куни Россия ТИВга Испания элчиси ҳам чақирилган, бу ҳам россиялик дипломатларнинг қиролликдан чиқариб юборилиши билан боғлиқ бўлган чорадир.
5 апрель куни Испания ҳукумати элчихонанинг мамлакат «манфаатлари ва хавфсизлигига хавф туғдирувчи» 25 нафар ходимини чиқариб юборишга қарор қилганди. ТИВ вакили Мария Захарова ўшанда «тегишли жавоб чоралари» кўрилишини ваъда қилган, аммо шу пайтгача бундай чора-тадбирлар қўлланмаган эди.
Изоҳ (0)