O‘zbekiston va boshqa MDH mamlakatlarida pul o‘tkazmalari inqirozi prognoz qilindi

Jahon bankiga ko‘ra, G‘arb sanksiyalari tufayli Rossiyadan pul o‘tkazmalari bilan bog‘liq muammolar Markaziy Osiyo va Kavkaz mamlakatlari daromadlariga salbiy ta’sir o‘tkazmoqda. Bu haqda “Kommersant” xabar berdi.

Rossiyadagi iqtisodiy muammolar bir qator MDH davlatlarining pul o‘tkazmalariga yuqori darajada qaramligini va mintaqadagi qashshoqlik muammosini yanada kuchaytirishi mumkin.

Jahon banki, Migratsiya va taraqqiyot bo‘yicha global hamkorlik (KNOMAD) loyihasi Yevropa va Markaziy Osiyodagi past va o‘rta daromadli mamlakatlarga pul oqimlari 2021-yilda 7,8 foizga oshganidan keyin 2022-yilda 1,6 foizga qisqarishini prognoz qildi.

Ukrainadagi inqiroz va Rossiyaga qarshi sanksiyalar, Jahon banki hisob-kitoblariga ko‘ra, rasmiy ravishda qayd etilgan pul o‘tkazmalari oqimining O‘zbekistonda 21 foizga qisqarishiga olib keladi.

Bu ko‘rsatkich Qirg‘izistonda — 32 foiz,Tojikistonda — 22 foiz va Armanistonda — 19 foiz.

Bu, ayniqsa, yalpi ichki mahsulotdagi tashqi pul o‘tkazmalarining ulushi bo‘yicha dunyoda uchinchi va to‘rtinchi o‘rinlarni egallagan Tojikiston va Qirg‘iziston uchun xavflidir (mos ravishda 34 foiz va 33 foiz).

Jahon bankining 2022-yilda Rossiya yalpi ichki mahsulotining 11 foizga pasayishi va rubl kursining dollarga nisbatan 26 foizga qadrsizlanishi prognozi migrantlarning bandligi va daromadlarini kamaytirishi mumkin.

Jahon banki pul o‘tkazmalari narxini ikki baravar kamaytirishni va KNOMAD pul o‘tkazmalari oqimi ma’lumotlari sifatini yaxshilashni maqsad qilgan.

Biroq Rossiyaning xalqaro to‘lov tizimlaridan uzilishi tashkilotning rejalarini buzishi mumkin.

Shu sababli o‘tkazmalar bo‘yicha batafsil ma’lumot yo‘qligi xalqaro tashkilotlar uchun MDH mamlakatlarida tartibga solinmagan pul oqimlarini kuzatishni qiyinlashtiradi.

Jahon banki, shuningdek, sanksiyalar rasmiy kanallar orqali pul o‘tkazmalari tizimini buzishi va butun dunyo bo‘ylab norasmiy pul o‘tkazmalariga qisman o‘tishga olib kelishi mumkinligini ham inkor etmadi.

Avvalroq Ukrainadagi urush O‘zbekiston iqtisodiyotiga qanday ta’sir qilayotgani haqida mutaxassis izohi xabar qilingan edi.