Ўзбекистон ва бошқа МДҲ мамлакатларида пул ўтказмалари инқирози прогноз қилинди

Жаҳон банкига кўра, Ғарб санкциялари туфайли Россиядан пул ўтказмалари билан боғлиқ муаммолар Марказий Осиё ва Кавказ мамлакатлари даромадларига салбий таъсир ўтказмоқда. Бу ҳақда «Коммерсантъ» хабар берди.

Россиядаги иқтисодий муаммолар бир қатор МДҲ давлатларининг пул ўтказмаларига юқори даражада қарамлигини ва минтақадаги қашшоқлик муаммосини янада кучайтириши мумкин.

Жаҳон банки, Миграция ва тараққиёт бўйича глобал ҳамкорлик (KNOMAD) лойиҳаси Европа ва Марказий Осиёдаги паст ва ўрта даромадли мамлакатларга пул оқимлари 2021 йилда 7,8 фоизга ошганидан кейин 2022 йилда 1,6 фоизга қисқаришини прогноз қилди.

Украинадаги инқироз ва Россияга қарши санкциялар, Жаҳон банки ҳисоб-китобларига кўра, расмий равишда қайд этилган пул ўтказмалари оқимининг Ўзбекистонда 21 фоизга қисқаришига олиб келади.

Бу кўрсаткич Қирғизистонда — 32 фоиз,Тожикистонда — 22 фоиз ва Арманистонда — 19 фоиз.

Бу, айниқса, ялпи ички маҳсулотдаги ташқи пул ўтказмаларининг улуши бўйича дунёда учинчи ва тўртинчи ўринларни эгаллаган Тожикистон ва Қирғизистон учун хавфлидир (мос равишда 34 фоиз ва 33 фоиз).

Жаҳон банкининг 2022 йилда Россия ялпи ички маҳсулотининг 11 фоизга пасайиши ва рубль курсининг долларга нисбатан 26 фоизга қадрсизланиши прогнози мигрантларнинг бандлиги ва даромадларини камайтириши мумкин.

Жаҳон банки пул ўтказмалари нархини икки баравар камайтиришни ва KNOMAD пул ўтказмалари оқими маълумотлари сифатини яхшилашни мақсад қилган.

Бироқ Россиянинг халқаро тўлов тизимларидан узилиши ташкилотнинг режаларини бузиши мумкин.

Шу сабабли ўтказмалар бўйича батафсил маълумот йўқлиги халқаро ташкилотлар учун МДҲ мамлакатларида тартибга солинмаган пул оқимларини кузатишни қийинлаштиради.

Жаҳон банки, шунингдек, санкциялар расмий каналлар орқали пул ўтказмалари тизимини бузиши ва бутун дунё бўйлаб норасмий пул ўтказмаларига қисман ўтишга олиб келиши мумкинлигини ҳам инкор этмади.

Аввалроқ Украинадаги уруш Ўзбекистон иқтисодиётига қандай таъсир қилаётгани ҳақида мутахассис изоҳи хабар қилинган эди.