Toshkent shahar Mirzo Ulug‘bek tumani Yahyo G‘ulomov ko‘chasidagi ma’muriy binolar kimoshdi savdosida sotildi. Bu haqda “E-auksion” portalida ma’lumot berildi.
Obyekt 1968-yilda qurilgan bo‘lib, gaz, suv, elektr tarmog‘i va kanalizatsiya tizimi mavjud. Yer uchastkasining egallagan maydoni — 0,32 gektar.
Auksionga qo‘yilgan binolarning boshlang‘ich narxi 30,7 mlrd so‘m edi. Kimoshdi savdosida 4 nafar ishtirokchi qatnashdi va ma’muriy binolarning yakuniy narxi 38,4 mlrd so‘m qilib baholandi.
Shu tariqa lot boshlang‘ich narxidan qariyb 8 mlrd so‘m ko‘proqqa sotildi.
Auksion g‘olibi Zamira Tursunova bo‘ldi. U “Teledoctor” va “Tosh Travel Product” kompaniyalarida ulushga ega.
Mazkur davlat aktivi “Respublika maxsus aloqa bog‘lamasi” davlat unitar korxonasi balansida bo‘lib, Davlat aktivlarini boshqarish agentligi Toshkent shahar hududiy boshqarmasi tomonidan ochiq auksion savdolariga chiqarilgan edi.
Avvalroq Toshkentda MIB tomonidan auksionga qo‘yilgan 3 xonali kvartira 1 mlrd so‘mga sotilgani haqida xabar berilgandi.
Izoh (0)