O‘zbekiston prezidenti Shavkat Mirziyoyev 16-may kuni Turkmaniston Milliy Kengashi Xalq Maslahati raisi Gurbanguli Berdimuhamedov bilan telefon orqali muloqot qildi. Bu haqda davlat rahbarining matbuot xizmati xabar berdi.
Ma’lum qilinishicha, O‘zbekiston va Turkmaniston o‘rtasidagi do‘stlik, yaxshi qo‘shnichilik va strategik sheriklik munosabatlarini yanada mustahkamlashning dolzarb masalalari ko‘rib chiqilgan. Sermahsul parlamentlararo muloqot, shu jumladan, mintaqaviy formatda ham rivojlanib borayotgani mamnuniyat bilan qayd etilgan.
Davlat rahbari Turkmaniston tomonini 2022-yil 12–13-may kunlari Ashxobod shahrida xalqaro tadbirlar — Markaziy Osiyo mamlakatlari va Rossiyaning birinchi Parlamentlararo forumi hamda Xotin-qizlari muloqoti muvaffaqiyatli o‘tkazilgani bilan samimiy qutlagan.
Forum ishini muntazam yo‘lga qo‘yish, uning doimiy faoliyat yuritadigan kotibiyatini tuzish taklifi qo‘llab-quvvatlangan.
Xalqaro kun tartibi yuzasidan, mintaqaviy hamkorlikni davom ettirish va ko‘p tomonlama tashkilotlar doirasidagi samarali sheriklikni rivojlantirish, shu jumladan, Afg‘onistonda tinchlik va xavfsizlikni ta’minlashga, uning iqtisodiy tiklanishiga ko‘maklashish masalalari bo‘yicha fikr almashilgan.
Eslatib o‘tamiz, Shavkat Mirziyoyev Iqtisodiy hamkorlik tashkiloti sammitida ishtirok etish uchun 2021-yilning 28-noyabr kuni tongda Ashxobod shahriga borgandi.
Izoh (0)