Buxoroda otasi nomiga 245 mln so‘m kredit ajratib, mablag‘ni “yeb ketgan” bank xodimiga jinoyat ishi qo‘zg‘atildi

Buxoroda sobiq bank xodimi faoliyati davomida otasi nomiga kredit mablag‘lari ajratib, boshqa maqsadlarga sarflab, talon-taroj qilgani aniqlandi. Bu haqda “Daryo”ga iqtisodiy jinoyatlarga qarshish kurash departamenti viloyat boshqarmasi axborot xizmati ma’lum qildi.

Tekshiruv davomida bankning sobiq mutaxassisi M.K. o‘z otasi M.T. nomiga tashkil etilgan “K.H.” MCHJga maishiy texnika sotib olish uchun 245 million so‘m kredit mablag‘i ajratilishiga erishgani aniqlangan. O‘rganishlar natijasida ushbu kredit mablag‘lari amalda boshqa maqsadlarda sarflanib, talon-toroj qilgani oydinlashgan.

“Bankning sobiq xodimi M.K. markaz nomidan notarial idoraga soxta xat taqdim qilib, kredit ta’minoti sifatida garovga qo‘yilgan 391,1 million so‘mlik Yuchang rusumli tirkamani taqiqdan chiqarib yuborgani aniqlandi. Yaqindagina mazkur bankka rahbar etib tayinlanganman. M.K. esa bundan besh oycha ilgari o‘z faoliyati davomidagi kamchiliklari tufayli ishdan bo‘shatilgan ekan. Vaqt o‘tib, departament xodimlarining ko‘magi bilan uning boshqa talon-tarojliklari ham yuzaga chiqdi”, — deydi Kogon tuman ATB “Mikrokreditbank” rahbari.

Xuddi shunday holat bankning Kogon shahar bo‘limi mutaxassisi B.R. tomonidan ham sodir etilgan. B.R. 2021-yilda besh nafar fuqaro nomiga ularning xabardorligisiz jami 156,5 million so‘m mikroqarz va imtiyozli kredit ajratilishiga erishgan. Tekshiruv davomida B.R. ushbu mablag‘larni o‘zlashtirish yo‘li bilan talon-toroj qilganligi, jinoiy harakatlarini yashirish maqsadida fuqarolar — A.D. va U.R.larning kredit yig‘ma jildlarini qasddan yo‘qotib yuborgan aniqlangan.

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 233-moddasi (band solingan mulkni qonunga xilof ravishda tasarruf etish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish) va 227-moddasi (avtomototransport vositalarini yashirish) bilan jinoyat ishlari qo‘zg‘atilib, tergov harakatlari o‘tkazilmoqda.