Toshkent shahrida joylashgan “Samarqand darvoza” savdo majmuasi oldida 1-yanvar kuni fuqarolar Yangi yilni nishonlash maqsadida qo‘lbola “ognetushitel” portlatgani, oqibatda holatni videoga olayotgan 3 kishi jarohatlangani xabar qilingandi. Toshkent shahar sudlarining ma’lum qilishicha, Jinoyat ishlari bo‘yicha Shayxontohur tuman sudida “ognetushitel” portlatgan 8 nafar yigitga hukm o‘qilgan.
Portlash 1-yanvar kuni soat 00:45 atrofida Shayxontohur tumani Qoratosh ko‘chasida sodir bo‘lgan. Bayram bahona yig‘ilgan bir nechta fuqarolar avtoyo‘lni ajratib turuvchi to‘siqqa mushakbozlik qilish maqsadida qo‘lbola usulda yasalgan o‘t o‘chirish moslamasini joylashtirgan. Tagidan olov yoqilishi oqibatida moslama portlab, bo‘laklarga bo‘linib ketgan.
Qayd etilishicha, avvalgi yillarda ham shunday o‘t o‘chirgichlarda sinab ko‘rilgan portlashlarni internet orqali ko‘rgan yigit yangiyo‘llik tanishi bilan bog‘lanib, shunaqa moslama topib berishini so‘ragan.
“Voqea joyidan 35 metr uzoqlikda turgan edim. Portlagandan keyin oyog‘imda tegdi, sezganim yo‘q. Keyin begona bolalar oyog‘im qonayotganini aytib, shifoxonaga olib borishdi. To‘rtta barmoq singan deb tashxis qo‘yishdi. Bitta barmog‘imni olib tashlashgan, keyingi operatsiyada pay bilan nervlarni ulashadi. 55 kun davolandim. Sudlanuvchilardan biri moddiy yordam ko‘rsatdi. Hech kimdan da’voyim yo‘q, sudga havola qilaman”, — deydi jabrlanuvchi.
Ta’kidlanishicha, sudlanuvchilarning eng kattasi — 25, kichigi esa 19 yoshda.
Jinoyat ishlari bo‘yicha Shayxontohur tuman sudida ko‘rib chiqilgan ishda sudlanuvchi Jinoyat kodeksining 250-1-moddasi (portlash xavfi bo‘lgan moddalar yoki pirotexnika buyumlaridan foydalanish qoidalarini buzish) 2-qismi “b, d” bandlari bilan aybdor deb topilgan va to‘rt yilga ozodlikdan mahrum etilgan. Shuningdek, yana to‘rt nafar sudlanuvchi — to‘rt yil muddatga ozodlikdan mahrum etish, yana uch nafariga to‘rt yil muddatga ozodlikni cheklash jazosi tayinlangan.
Eslatib o‘tamiz, 1-yanvar kuni Sirdaryo viloyatida ham shunga o‘xshash holat sodir bo‘lgan. Sirdaryo tumani “Do‘stlik” mahallasida yashovchi fuqaro (2003-yilda tug‘ilgan) o‘t o‘chirish moslamasi portlatgani uchun 15 sutkaga qamalgan.
Izoh (0)