Бухорода отаси номига 245 млн сўм кредит ажратиб, маблағни «еб кетган» банк ходимига жиноят иши қўзғатилди

Бухорода собиқ банк ходими фаолияти давомида отаси номига кредит маблағлари ажратиб, бошқа мақсадларга сарфлаб, талон-тарож қилгани аниқланди. Бу ҳақда «Дарё»га иқтисодий жиноятларга қаршиш кураш департаменти вилоят бошқармаси ахборот хизмати маълум қилди.

Текширув давомида банкнинг собиқ мутахассиси М.К. ўз отаси М.Т. номига ташкил этилган «К.Ҳ.» МЧЖга маиший техника сотиб олиш учун 245 миллион сўм кредит маблағи ажратилишига эришгани аниқланган. Ўрганишлар натижасида ушбу кредит маблағлари амалда бошқа мақсадларда сарфланиб, талон-торож қилгани ойдинлашган.

«Банкнинг собиқ ходими М.К. марказ номидан нотариал идорага сохта хат тақдим қилиб, кредит таъминоти сифатида гаровга қўйилган 391,1 миллион сўмлик Ючанг русумли тиркамани тақиқдан чиқариб юборгани аниқланди. Яқиндагина мазкур банкка раҳбар этиб тайинланганман. М.К. эса бундан беш ойча илгари ўз фаолияти давомидаги камчиликлари туфайли ишдан бўшатилган экан. Вақт ўтиб, департамент ходимларининг кўмаги билан унинг бошқа талон-тарожликлари ҳам юзага чиқди», — дейди Когон туман АТБ «Микрокредитбанк» раҳбари.

Худди шундай ҳолат банкнинг Когон шаҳар бўлими мутахассиси Б.Р. томонидан ҳам содир этилган. Б.Р. 2021 йилда беш нафар фуқаро номига уларнинг хабардорлигисиз жами 156,5 миллион сўм микроқарз ва имтиёзли кредит ажратилишига эришган. Текширув давомида Б.Р. ушбу маблағларни ўзлаштириш йўли билан талон-торож қилганлиги, жиноий ҳаракатларини яшириш мақсадида фуқаролар — А.Д. ва У.Р.ларнинг кредит йиғма жилдларини қасддан йўқотиб юборган аниқланган.

Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 233-моддаси (банд солинган мулкни қонунга хилоф равишда тасарруф этиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш) ва 227-моддаси (автомототранспорт воситаларини яшириш) билан жиноят ишлари қўзғатилиб, тергов ҳаракатлари ўтказилмоқда.