Janubiy Koreya va AQSH milliy xavfsizlik maslahatchilari Kim Son Xan va Jeyk Sallivan telefon orqali suhbatda Shimoliy Koreyaning raketa uchirishlaridan jiddiy xavotir bildirib, ularni “provokatsiya” deb atadi.
“Ikkala tomon Shimoliy Koreyaning so‘nggi provokatsion harakatlari, jumladan, ballistik raketa uchirilishidan jiddiy xavotir bildirdi hamda Janubiy Koreya va Qo‘shma Shtatlar o‘rtasida Shimolga oid muvofiqlashtirishni yanada kuchaytirishga kelishib oldi”, — deyiladi Janubiy Koreya prezidenti ma’muriyati bayonotida.
Shuningdek, ular Baydenning 20—22-may kunlari Seulga bo‘lajak tashrifini muhokama qildi va bu ikki mamlakat o‘rtasidagi keng qamrovli strategik ittifoqni mustahkamlashda “katta burilish nuqtasi” bo‘lib xizmat qilishini ta’kidladi.
Maslahatchilar tashrif muvaffaqiyatli o‘tishini ta’minlash uchun hamkorlikda ishlashni davom ettirishga kelishib oldi, shu bilan birga ular o‘rtasida yaqindan va yaponiyalik hamkasbi bilan uch tomonlama asosda maslahatlashuvlar mexanizmini zudlik bilan yo‘lga qo‘yish zarurligini qayd etdi.
Oq uyning suhbat haqidagi hisobotida maslahatchilar “prezident Bayden va Janubiy Koreya prezidenti Yun Sok Yol o‘rtasidagi uchrashuv zamonaviy AQSH—Koreya ittifoqining kuchi va kengligini namoyon etish uchun imkoniyat ekanini ta’kidladi”.
“Rasmiylar Shimoliy Koreyaning ballistik raketa uchirishini BMT Xavfsizlik Kengashi rezolyutsiyalarini buzish sifatida qoraladi hamda KXDR tomonidan tahdidlarni bartaraf etish, shuningdek, Koreya yarim orolini to‘liq yadrosizlantirish bo‘yicha umumiy maqsadimizga erishish uchun yaqin hamkorlikni davom ettirishga kelishib oldi”, — deyiladi Oq uy xabarida.
12-may kuni Shimoliy Koreya Yapon dengizi tomonga 3 ta ballistik raketalarni uchirgan edi. G‘arb ommaviy axborot vositalari bu KXDRning yil boshidan beri ketma-ket 15-marta raketa uchirishi ekanini ta’kidladi. Shimoliy Koreya bir necha kun avval ham suvosti kemasidan uchiriladigan ballistik raketani sinovdan o‘tkazgan. Sinov KXDRning Yapon dengizi sohilidagi Sinpo shahri yaqinidagi suvlarda amalga oshirilgan.
Mart oyi oxirida Kim Chen In mamlakatni faqat keng ko‘lamli hujum qurollari himoyalay olishini aytib, KXDR yanada kuchli qurollarni ishlab chiqishi va armiyani qurollantirishda davom etishiga va’da bergandi. Pxenyan, shuningdek, Seulning harbiy harakatlariga javoban yadro qurolidan foydalanish bilan tahdid qildi; Shu bilan birga KXDR Janubiy Koreya bilan urushga qarshi ekanini va uni dushman deb hisoblamasligini bildirgan.
Izoh (0)