Jahon sog‘liqni saqlash tashkiloti (JSST)ning Yevropa mintaqasi koronavirus infeksiyasiga chalinish oqibatlaridan vafot etganlar soni bo‘yicha 2 millionlik marradan o‘tdi, deb yozadi “Interfaks”.
Tashkilotning Yevropa mintaqasi 53 ta mamlakatni o‘z ichiga olib, Atlantika okeanidan Tinch okeanigacha bo‘lgan katta hududni qamrab oladi. U yerda koronavirus bilan kasallanish bo‘yicha jami 218 millionta holat qayd etilgan.
Mart oyining birinchi yarmida Yevropada bir avj olgan koronavirus pandemiyasi asta-sekin pasayishni boshladi. So‘nggi bir haftada kasallanganlar va vafot etganlar soni tegishli ravishda 26 va 24 foizga qisqargan.
Aksariyat Yevropa mamlakatlari sanitariya cheklovlarini bekor qilmoqda. Xususan, Fransiya 16-maydan jamoat transportida niqob taqishdan voz kechadi.
Ayni paytda AQShda pandemiya boshidan buyon koronavirusdan vafot etganlar soni bir million kishidan oshdi. Prezident Jo Bayden ularning xotirasiga butun mamlakat bo‘ylab bayroqlar tushirilishini e’lon qildi.
Ushbu bayonotdan keyin bir necha soat o‘tib, Bayden AQShda COVID-19 bilan bog‘liq vaziyat yuzasidan ikkinchi sammitni chaqirdi. Bundan sal avvalroq Oq uy Kongressdan koronavirusga qarshi kurashda qo‘shimcha yordam sifatida 22,5 million dollar so‘ragan edi.
AQSh Sog‘liqni saqlash vazirligi ma’lumotlariga ko‘ra, koronavirusdan vafot etgan amerikaliklarning aniq soni 12-may holatiga 997 481 kishini tashkil etadi. Qayd etilishicha, so‘nggi bir oy ichida mamlakatda kasallanish darajasi ortib bormoqda: 1-aprelda 27 ming kishi kasallangan bo‘lsa, 11-mayda ularning soni 84 mingni tashkil qilgan.
JSST ma’lumotlariga ko‘ra, 13-may holatiga butun dunyoda kasallanish holatlari soni 519 million, qurbonlar soni esa 6,26 million kishidan oshgan.
Izoh (0)