Birlashgan Millatlar Tashkilotining Inson huquqlari bo‘yicha Oliy komissari boshqarmasi ma’lumotlariga ko‘ra, Rossiyaning Ukrainaga bosqini boshlanganidan buyon 3541 nafar tinch aholi halok bo‘lgan, 3785 nafari yaralangan.
Qurbonlarning 3302 nafari kattalar, 239 nafari voyaga yetmaganlarni tashkil etmoqda, jarohatlanganlar orasida esa 355 nafar voyaga yetmaganlar bor.
Qurbonlar va yaradorlarning eng ko‘pi — mos ravishda 1897 va 1949 kishi Donetsk va Lugansk viloyatlariga to‘g‘ri keladi.
Xalqaro migratsiya tashkiloti ma’lumotlariga ko‘ra, 8 milliondan ortiq ukrainalik o‘z uyini tashlab, mamlakatning boshqa hududlariga ko‘chib o‘tishga majbur bo‘lgan.
BMT 3-may kuni Ukrainada urush boshidan buyon halok bo‘lgan tinch aholi soni 3153 nafarga yetgani, 9-may kuni esa 3381 nafarga yetgani haqida ma’lumotlar bergandi.
Rossiya 24-fevral kuni Ukrainada “maxsus harbiy operatsiya” boshladi. Rossiya prezidenti Vladimir Putin o‘z maqsadlarini “sakkiz yil davomida Kiyev rejimi tomonidan zo‘ravonlik, genotsidga uchragan odamlarni himoya qilish”, shuningdek, qo‘shni davlatni “demilitarizatsiya va denasifikatsiya qilish” bilan izohladi.
Rossiya Mudofaa vazirligi Rossiya harbiylari faqat harbiy nishonlarga zarba berayotganini bir necha bor ta’kidlagan. Ammo eng ko‘p tinch aholining halok bo‘lishi Rossiya qo‘shinlar ishg‘ol qilgan hududlarda kuzatilmoqda.
Izoh (0)