Жанубий Корея ва АҚШ миллий хавфсизлик маслаҳатчилари Ким Сон Хан ва Жейк Салливан телефон орқали суҳбатда Шимолий Кореянинг ракета учиришларидан жиддий хавотир билдириб, уларни «провокация» деб атади.
«Иккала томон Шимолий Кореянинг сўнгги провокацион ҳаракатлари, жумладан, баллистик ракета учирилишидан жиддий хавотир билдирди ҳамда Жанубий Корея ва Қўшма Штатлар ўртасида Шимолга оид мувофиқлаштиришни янада кучайтиришга келишиб олди», — дейилади Жанубий Корея президенти маъмурияти баёнотида.
Шунингдек, улар Байденнинг 20—22 май кунлари Сеулга бўлажак ташрифини муҳокама қилди ва бу икки мамлакат ўртасидаги кенг қамровли стратегик иттифоқни мустаҳкамлашда «катта бурилиш нуқтаси» бўлиб хизмат қилишини таъкидлади.
Маслаҳатчилар ташриф муваффақиятли ўтишини таъминлаш учун ҳамкорликда ишлашни давом эттиришга келишиб олди, шу билан бирга улар ўртасида яқиндан ва япониялик ҳамкасби билан уч томонлама асосда маслаҳатлашувлар механизмини зудлик билан йўлга қўйиш зарурлигини қайд этди.
Оқ уйнинг суҳбат ҳақидаги ҳисоботида маслаҳатчилар «президент Байден ва Жанубий Корея президенти Юн Сок Ёл ўртасидаги учрашув замонавий АҚШ—Корея иттифоқининг кучи ва кенглигини намоён этиш учун имконият эканини таъкидлади».
«Расмийлар Шимолий Кореянинг баллистик ракета учиришини БМТ Хавфсизлик Кенгаши резолюцияларини бузиш сифатида қоралади ҳамда КХДР томонидан таҳдидларни бартараф этиш, шунингдек, Корея ярим оролини тўлиқ ядросизлантириш бўйича умумий мақсадимизга эришиш учун яқин ҳамкорликни давом эттиришга келишиб олди», — дейилади Оқ уй хабарида.
12 май куни Шимолий Корея Япон денгизи томонга 3 та баллистик ракеталарни учирган эди. Ғарб оммавий ахборот воситалари бу КХДРнинг йил бошидан бери кетма-кет 15 марта ракета учириши эканини таъкидлади. Шимолий Корея бир неча кун аввал ҳам сувости кемасидан учириладиган баллистик ракетани синовдан ўтказган. Синов КХДРнинг Япон денгизи соҳилидаги Синпо шаҳри яқинидаги сувларда амалга оширилган.
Март ойи охирида Ким Чен Ин мамлакатни фақат кенг кўламли ҳужум қуроллари ҳимоялай олишини айтиб, КХДР янада кучли қуролларни ишлаб чиқиши ва армияни қуроллантиришда давом этишига ваъда берганди. Пхеньян, шунингдек, Сеулнинг ҳарбий ҳаракатларига жавобан ядро қуролидан фойдаланиш билан таҳдид қилди; Шу билан бирга КХДР Жанубий Корея билан урушга қарши эканини ва уни душман деб ҳисобламаслигини билдирган.
Изоҳ (0)