Bugungi kunda O‘zbekistondagi talabalarda 131 ming 600 o‘rinli turar joyga ehtiyoj mavjud. Bu haqda 12-may kuni AOKAda o‘tkazilgan matbuot anjumanida oliy va o‘rta maxsus ta’lim vaziri o‘rinbosari Sarvarxon Buzrukxonov ma’lum qildi, deya xabar bermoqda “Daryo” muxbiri.
Sarvarxon Buzrukxonovning aytishicha, ayni paytda 91 ming 400 nafar talaba TTJda, 148 ming nafar talaba esa ijarada yashaydi.
“2020-yilda respublikadagi talabalar turar joylaridagi (TTJ) o‘rinlar soni 60 mingta bo‘lgan. Bu o‘sha vaqtdagi ehtiyojning 28 foizini qoplagan va talabalarda qo‘shimcha 149 ming turar joyga ehtiyoj bor edi. 2021-yilda 20 mingta qo‘shimcha o‘rin yaratildi va yil yakuniga kelib turar joylar soni 91 ming 400 taga yetdi va umumiy ehtiyojning 41 foizi qoplandi. Qamrov kattaligi hisobiga 131 ming 600 o‘rinli TTJga bo‘lgan ehtiyoj saqlanib qoldi.
Tizimning 2-yo‘nalishi sifatida ijarada yashayotgan talabalarning ijara to‘lovlari davlat tomonidan qisman qoplab berilmoqda. Hozirda 148 ming talaba ijarada yashasa, Toshkent shahridagi talabalarga har oyda BHMning 1 baravari (270 ming so‘m) miqdorida, viloyatlarda tahsil olayotganlarga BHMning 0,5 baravari (135 ming so‘m) miqdorida kompensatsiya to‘lab berilmoqda. 2022-yilning o‘zida mazkur to‘lovlar uchun davlat budjetidan 120 milliard so‘m mablag‘ ajratildi. Joriy yilning 1-yanvaridan uyini talabalarga ijaraga berayotgan shaxslar daromad solig‘idan ozod qilindi. Bu ham ijaraga berishda qulaylik yaratadi”, — dedi vazirlik rasmiysi.
Sarvarxon Buzrukxonovning ta’kidlashicha, 2025-yilgacha respublikada 100 ming o‘rinli 228 ta TTJ davlat xususiy sherikligi asosida barpo etilishi belgilangan.
“2022-yilda 18 ming o‘rinli 47 ta TTJ qurish ko‘zda tutilgan va bu ishlar yil boshida boshlangan. Tadbirkorlar biz kutgan darajada qiziqish bildirmagach, subsidiya miqdori oshirildi. Davlat xususiy sheriklik asosida TTJ quradigan tadbirkorga barpo etgan binosining 20 foiziga egalik qilish huquqi berilib, hujjatlar kadastr bilan rasmiylashtiriladi. Bu tadbirkor 10 qavatli yotoqxona qursa, uning 2 qavati o‘ziga beriladi degani”, — dedi vazir o‘rinbosari.
Anjumanda ma’lum qilinishicha, so‘ngi 5 yilda oliy ta’lim muassasalariga talabalarni qamrab olish 3 barobarga oshgan.
Avvalroq talabalarga ijara to‘lovining bir qismini qoplab berish tartibi belgilangani xabar qilingandi.
Izoh (0)