Farg‘ona viloyati hokimligi Buvayda tuman hokimligi nashri — “Buvayda ko‘zgusi” gazetasida faoliyat yuritayotgan jurnalist Sharifa Murodga bosim o‘tkazilishi bilan bog‘liq voqeaga e’tibor qaratdi. Va jurnalistga bosim o‘tkazib, uni ishdan olishga uringan mas’ullar javobgarlikka tortilishini ma’lum qildi.
“Avvalo, shuni qayd etish lozimki, jurnalist o‘zi tayyorlagan xabarlar va materiallarni ommaviy axborot vositalari orqali tarqatish, ularda o‘z fikr-mulohazasini ifodalash huquqiga ega. Tanqidiy materiallar e’lon qilganligi uchun jurnalistni ta’qib qilishga yo‘l qo‘yilmasligi qonun bilan belgilab qo‘yilgan. Davlat jurnalistga axborotni erkin olishi va tarqatishini kafolatlaydi, o‘z kasbiga doir faoliyatni amalga oshirishida uning himoya qilinishini ta’minlaydi.
Sharifa Murodning ijtimoiy tarmoqlardagi tanqidiy chiqishi uchun ishdan bo‘shatishga urinish bilan bog‘liq holat mas’ul idoralar tomonidan oxirigacha o‘rganib chiqiladi, jurnalistlik faoliyatini himoya qilish to‘g‘risidagi qonunchilik buzilishi tasdiqlanadigan bo‘lsa, bunga yo‘l qo‘ygan shaxslar belgilangan tartibda javobgarlikka tortiladi”, — deyiladi hokimlik axborot xizmati xabarida.
Qo‘shimcha qilinishicha, jurnalist olib chiqqan muammo — Buvayda tumanidagi fermerning yeri tuman zaxirasiga qaytarilishining qonuniyligi bilan bog‘liq holat viloyat hokimligi tomonidan tuzilgan ishchi guruh tomonidan o‘rganib chiqiladi.
“O‘rganish natijalari yuzasidan qo‘shimcha ma’lumot e’lon qilinadi”, — deyiladi hokimiyat munosabatida.
Izoh (0)