Бугунги кунда Ўзбекистондаги талабаларда 131 минг 600 ўринли турар жойга эҳтиёж мавжуд. Бу ҳақда 12 май куни АОКАда ўтказилган матбуот анжуманида олий ва ўрта махсус таълим вазири ўринбосари Сарвархон Бузрукхонов маълум қилди, дея хабар бермоқда «Дарё» мухбири.
Сарвархон Бузрукхоновнинг айтишича, айни пайтда 91 минг 400 нафар талаба ТТЖда, 148 минг нафар талаба эса ижарада яшайди.
«2020 йилда республикадаги талабалар турар жойларидаги (ТТЖ) ўринлар сони 60 мингта бўлган. Бу ўша вақтдаги эҳтиёжнинг 28 фоизини қоплаган ва талабаларда қўшимча 149 минг турар жойга эҳтиёж бор эди. 2021 йилда 20 мингта қўшимча ўрин яратилди ва йил якунига келиб турар жойлар сони 91 минг 400 тага етди ва умумий эҳтиёжнинг 41 фоизи қопланди. Қамров катталиги ҳисобига 131 минг 600 ўринли ТТЖга бўлган эҳтиёж сақланиб қолди.
Тизимнинг 2-йўналиши сифатида ижарада яшаётган талабаларнинг ижара тўловлари давлат томонидан қисман қоплаб берилмоқда. Ҳозирда 148 минг талаба ижарада яшаса, Тошкент шаҳридаги талабаларга ҳар ойда БҲМнинг 1 баравари (270 минг сўм) миқдорида, вилоятларда таҳсил олаётганларга БҲМнинг 0,5 баравари (135 минг сўм) миқдорида компенсация тўлаб берилмоқда. 2022 йилнинг ўзида мазкур тўловлар учун давлат бюджетидан 120 миллиард сўм маблағ ажратилди. Жорий йилнинг 1 январидан уйини талабаларга ижарага бераётган шахслар даромад солиғидан озод қилинди. Бу ҳам ижарага беришда қулайлик яратади», — деди вазирлик расмийси.
Сарвархон Бузрукхоновнинг таъкидлашича, 2025 йилгача республикада 100 минг ўринли 228 та ТТЖ давлат хусусий шериклиги асосида барпо этилиши белгиланган.
«2022 йилда 18 минг ўринли 47 та ТТЖ қуриш кўзда тутилган ва бу ишлар йил бошида бошланган. Тадбиркорлар биз кутган даражада қизиқиш билдирмагач, субсидия миқдори оширилди. Давлат хусусий шериклик асосида ТТЖ қурадиган тадбиркорга барпо этган биносининг 20 фоизига эгалик қилиш ҳуқуқи берилиб, ҳужжатлар кадастр билан расмийлаштирилади. Бу тадбиркор 10 қаватли ётоқхона қурса, унинг 2 қавати ўзига берилади дегани», — деди вазир ўринбосари.
Анжуманда маълум қилинишича, сўнги 5 йилда олий таълим муассасаларига талабаларни қамраб олиш 3 баробарга ошган.
Аввалроқ талабаларга ижара тўловининг бир қисмини қоплаб бериш тартиби белгилангани хабар қилинганди.
Изоҳ (0)