Shimoliy Koreya 12-may kuni Yapon dengizi tomonga ballistik raketalarni uchirdi. Bu haqda Janubiy Koreya shtab boshliqlari birlashgan qo‘mitasi bayonotiga tayanib, OAV xabar berdi.
Yonhap agentligining xabar berishicha, gap qisqa masofaga uchuvchi uchta ballistik raketa haqida ketmoqda.
G‘arb ommaviy axborot vositalari bu KXDRning yil boshidan beri ketma-ket 15-marta raketa uchirishi ekanini ta’kidladi. 12-may kungi raketa uchirish Janubiy Koreyaning yangi prezidenti Yun Sok Yol lavozimiga kirishganidan beri birinchisi bo‘ldi. Yun Sok Yolning inauguratsiyasi 10-may kuni bo‘lib o‘tgandi.
Shimoliy Koreya bir necha kun avval ham suvosti kemasidan uchiriladigan ballistik raketani sinovdan o‘tkazgandi. Sinov KXDRning Yapon dengizi sohilidagi Sinpo shahri yaqinidagi suvlarda amalga oshirilgan.
Avvalroq Janubiy Koreyaning yangi mudofaa vaziri Li Chon Sop Shimol tomonidan ehtimoliy “taktik” provokatsiyalarga keskin javob berilishi haqida ogohlantirgan va AQSH bilan ittifoqni mustahkamlash tarafdori ekanini ta’kidlagan edi.
Mart oyi oxirida Kim Chen In mamlakatni faqat keng ko‘lamli hujum qurollari himoyalay olishini aytib, KXDR yanada kuchli qurollarni ishlab chiqishi va armiyani qurollantirishda davom etishiga va’da bergandi. Pxenyan, shuningdek, Seulning harbiy harakatlariga javoban yadro qurolidan foydalanish bilan tahdid qildi; Shu bilan birga KXDR Janubiy Koreya bilan urushga qarshi ekanini va uni dushman deb hisoblamasligini bildirgan.
Izoh (0)