Birlashgan Millatlar Tashkiloti (BMT) KXDR o‘zining Pungeri yadro poligonini qayta tiklayotgan bo‘lishi mumkinligini ma’lum qildi.
Tashkilot tarqatgan press-relizga ko‘ra, yangi qurilish belgilari sun’iy yo‘ldoshdan olingan suratlarda 2018-yil — poligon yopilganidan buyon birinchi marta qayd etilgan.
BMT bosh kotibining Yaqin Sharq va Osiyo-Tinch okeani mintaqasi bo‘yicha yordamchisi Xalid Xiariy tashkilot Xavfsizlik kengashi majlisida ta’kidlashicha, 25 va 30-aprelda KXDR yetakchisi bergan bayonotlarga muvofiq, Pxenyan preventiv tarzda yadro qurolini qo‘llashi mumkin.
“Bunday mazmundagi bayonotlar chuqur xavotir uyg‘otadi”, — dedi Xiariy.
Avvalroq Shimoliy Koreya rahbari Kim Chen In Koreya armiyasi qo‘mondonlik tarkibi bilan uchrashuvda mamlakat va partiya yadroviy xavfni preventiv tarzda tiyib turishga tayyor bo‘lishi kerakligini aytgandi.
Ungacha esa u Pxenyanning yadroviy salohiyatini “eng tezkor sur’atlarda” kuchaytirishga va’da bergandi. Kim Chen Inning so‘zlariga ko‘ra, mamlakat istalgan vaqtda yadroviy “tiyib turish”ga murojaat qila olishi uchun KXDR puxtalik bilan tayyorlanadi.
2018-yil mayida KXDR Pungeri sinov yadro poligonidagi tunnellarni demontaj qilgan edi. Poligonning uchta tunneli ushbu voqeani yoritish uchun KXDRga taklif qilingan qariyb 20 nafar jurnalist ko‘z o‘ngida portlatilgandi. Ayni vaqtda yadro quroli bo‘yicha xalqaro ekspertlar poligonga qo‘yilmagan. So‘nggi vaqtlarda G‘arb va Janubiy Koreya OAVlari Shimoliy Koreya yadroviy sinovlar o‘tkazishga tayyorlanayotgani va Pungeri yadro poligonining uchinchi tunneliga olib boradigan yo‘lni tezlikda qayta tiklash ustida ishlayotgani haqida bir necha bor ma’lum qilgandi. Taxminlarga ko‘ra, Pxenyan taktik raketalarga o‘rnatilishi mumkin bo‘lgan kichik yadro o‘qini sinab ko‘rishi mumkin. Agar eksperiment amalga oshsa, bu Pxenyan uchun to‘rt yarim yil ichidagi birinchi yadro sinovi bo‘ladi.
Izoh (0)