Шимолий Корея 12 май куни Япон денгизи томонга баллистик ракеталарни учирди. Бу ҳақда Жанубий Корея штаб бошлиқлари бирлашган қўмитаси баёнотига таяниб, ОАВ хабар берди.
Yonhap агентлигининг хабар беришича, гап қисқа масофага учувчи учта баллистик ракета ҳақида кетмоқда.
Ғарб оммавий ахборот воситалари бу КХДРнинг йил бошидан бери кетма-кет 15 марта ракета учириши эканини таъкидлади. 12 май кунги ракета учириш Жанубий Кореянинг янги президенти Юн Сок Ёл лавозимига киришганидан бери биринчиси бўлди. Юн Сок Ёлнинг инаугурацияси 10 май куни бўлиб ўтганди.
Шимолий Корея бир неча кун аввал ҳам сувости кемасидан учириладиган баллистик ракетани синовдан ўтказганди. Синов КХДРнинг Япон денгизи соҳилидаги Синпо шаҳри яқинидаги сувларда амалга оширилган.
Аввалроқ Жанубий Кореянинг янги мудофаа вазири Ли Чон Соп Шимол томонидан эҳтимолий «тактик» провокацияларга кескин жавоб берилиши ҳақида огоҳлантирган ва АҚШ билан иттифоқни мустаҳкамлаш тарафдори эканини таъкидлаган эди.
Март ойи охирида Ким Чен Ин мамлакатни фақат кенг кўламли ҳужум қуроллари ҳимоялай олишини айтиб, КХДР янада кучли қуролларни ишлаб чиқиши ва армияни қуроллантиришда давом этишига ваъда берганди. Пхеньян, шунингдек, Сеулнинг ҳарбий ҳаракатларига жавобан ядро қуролидан фойдаланиш билан таҳдид қилди; Шу билан бирга КХДР Жанубий Корея билан урушга қарши эканини ва уни душман деб ҳисобламаслигини билдирган.
Изоҳ (0)