Finlyandiya prezidenti Sauli Niinistyo va bosh vazir Sanna Marin NATOga tezroq a’zo bo‘lish zarurligi haqida qo‘shma bayonot chiqardi, deb yozmoqda CNN.
“NATOga a’zo bo‘lish Finlyandiya xavfsizligini mustahkamlaydi, Finlyandiya esa NATOga qo‘shilish orqali butun ittifoqni mustahkamlaydi”, — deya bayonotdan iqtibos keltirgan CNN telekanali. Finlyandiya prezidenti va hukumat rahbari NATOga a’zo bo‘lish uchun zudlik bilan ariza topshirish kerakligini ta’kidladi.
“Umid qilamizki, kelgusi bir necha kun ichida ushbu qarorni qabul qilish uchun milliy darajada barcha zarur choralar ko‘riladi”, — deyilgan bayonotda.
Rossiya prezidenti matbuot kotibi Dmitriy Peskovning jurnalistlarga aytishicha, Finlyandiyaning NATOga a’zolik haqidagi arizasi Rossiya tomonidan so‘zsiz tahdid sifatida baholanmoqda. Unga ko‘ra, Moskvaning keyingi harakatlari NATOning “kengayish jarayoni” qanday borishi va alyansning harbiy infratuzilmasi qanday harakatlanishiga bog‘liq bo‘ladi.
Avvalroq Finlyandiyaning Helsingin Sanomat gazetasi mamlakat hukumati 15-may kuni NATOga a’zo bo‘lish uchun ariza berishni rejalashtirayotgani haqida xabar bergandi. Shu bilan birga, nashrning yozishicha, Shvetsiya ham xuddi shu kuni ariza topshiradi.
Neytral maqomga ega Shvetsiya va Finlyandiyaning NATOga kirishi Rossiyaning Ukrainaga bostirib kirishidan keyin faol muhokama qilina boshladi. Mamlakatlar alyansga a’zolik uchun yozda ariza topshirishi mumkinligi xabar qilingandi. Shu bilan birga Shvetsiya hukmron partiyasining bir qismi mamlakatning NATOga kirishiga qarshi. AQSH mazkur ikki davlat NATO tarkibiga kirsa, ularning xavfsizligini ta’minlashga tayyorligini bildirgan.
Finlyandiya quruqlikda Rossiya bilan 1200 kilometrdan ortiq umumiy chegaraga ega.
Izoh (0)