Афғонистонда ҳокимият тепасида бўлган «Толибон» ҳаракати Панжшер вилоятидаги Миллий қаршилик фронти билан кечган қизғин жанглардан сўнг вилоятдаги қўшинлари сонини 5 минггача оширди. Бу ҳақда TOLOnews телеканали «Толибон» маъмуриятининг Панжшердаги вакили Абубакр Сиддиқийга асосланиб хабар берди.
Ушбу вилоятда Миллий қаршилик фронтининг кучлари ва «Толибон» ҳаракати ўртасида шиддатли тўқнашувлар 6 майдан 7 майга ўтар кечаси содир бўлган. Оқибатда қаршилик кучлари ўтган йилнинг сентябрь ойидан бери биринчи марта бутун бир туманни ўз назоратига олишга муваффақ бўлди. Улар Дара туманидаги «Толибон» кучларини қисман йўқ қилишга ёки уларни тор-мор этишга муваффақ бўлди.
Сиддиқийнинг сўзларига кўра, жанглар оқибатида толиблар беш нафар одамини йўқотган, икки нафари яраланган. Шунингдек, унинг аниқлик киритишича, ўлганларнинг жасадлари туғилиб ўсган вилоятларига дафн қилиш учун юборилган. Айни вақтда Миллий қаршилик фронти ўз кучлари «Толибон»нинг 27 нафар жангарисини ўлдирганини даъво қилмоқда. Шу билан бирга улар олти нафар жангчиси ҳалок бўлганини тан олди. Сиддиқийнинг даъво қилишича, «Толибон» камида 10 нафар қаршилик жангчисини ўлдиришга муваффақ бўлган.
«Толибон» 6—7 май кунлари Панжшерда фаол жанглар бўлганини дастлаб бутунлай рад этган эди.
Ҳозирда Дара туманини ким назорат қилаётгани ҳақида бир-бирига қарама-қарши хабарлар бор. Панжшердаги «Толибон» ҳукумати тумандаги вазият устидан назорат ўрнатганини даъво қилмоқда. Миллий қаршилик фронти вакилларининг сўзларига кўра, улар назорат зонасини Дарага туташ туманларга кенгайтирган.
Aamaj News хабарига кўра, Панжшерда қаршилик фронти томонидан мағлубиятга учраганидан сўнг «Толибон» саккиз нафар тинч аҳолини қаршилик кучлари билан алоқада бўлганликда айблаб, ҳибсга олган, қийноққа солган ва ўлдирган. Улар орасида аёл киши ҳам борлиги аниқланган.
Изоҳ (0)