Shavkat Mirziyoyev Toshkentning Yashnobod tumanida barpo etilgan “Uch avlod bog‘i”ni borib ko‘rdi, deb xabar bermoqda “Daryo” muxbiri.
Mahallalardagi ma’naviy muhitni yaxshilash, yoshlarni ezgu ishlarga undash maqsadida mahallalarda, ta’lim muassasalarida keksa va o‘rta avlod vakillari hamda yoshlar ishtirokida “Uch avlod uchrashuvlari” o‘tkazilmoqda. Ushbu yangi bog‘ ham shu maqsadga xizmat qiladi.
Ilgari bu joy qarovsiz, yo‘llari notekis edi. Endi Alimkent ko‘chasi ta’mirlanib, atrofi obodonlashtirilgan, daraxt va gullar ekildi, issiqxona va ishkomlar barpo etilgan, shuningdek, o‘rindiqlar, piyoda va velosiped yo‘laklari aholining hordiq chiqarishi uchun qulay sharoit yaratgan.
Shu yerda nuroniylar, mahalla faollari bilan muloqot bo‘lgan. Ular el-yurt fidoyilarining xotirasi ulug‘lanib, keksalarga alohida hurmat ko‘rsatilayotganini ta’kidlashgan.
Barcha hududlarda Nuroniylar kengashlari va mahallalarda keksalar ishlari bo‘yicha maslahatchi lavozimlari tashkil qilingan. “Faxriy murabbiy” ordeni ta’sis etildi. 3 500 nafardan ziyod yurtdoshlarimiz “Mehnat faxriysi” ko‘krak nishoni bilan taqdirlangan.
“Shunday zamon kelyaptiki, mahalla haqiqiy kuch bo‘lyapti. Masala hal bo‘layotganini xalqimiz sezyapti. Hamma joyga nuroniylar, xotin-qizlar va yoshlar bo‘yicha vakil qo‘ydik. Endi mahalla raisining “uchta ustuni” bor”, – dedi Shavkat Mirziyoyev.
Prezident farmoniga muvofiq, bayram arafasida Ikkinchi jahon urushi qatnashchilari va nogironlarining har biriga 15 million so‘mdan bir martalik pul mukofoti va sovg‘alar topshirilgan. Tuman va shahar hokimlari front ortida mehnat qilgan 10 ming nafar faxriylar bilan shaxsan uchrashib, holidan xabar olgan.
Foto
Avvalroq Shavkat Mirziyoyev Olmazor va Yashnobod tumanlaridagi Ikkinchi Jahon urushi qatnashchilarining xonadonlarida bo‘lgani to‘g‘risida xabar berilgandi.
Izoh (0)