Шавкат Мирзиёев Тошкентнинг Яшнобод туманида барпо этилган «Уч авлод боғи»ни бориб кўрди, деб хабар бермоқда «Дарё» мухбири.
Маҳаллалардаги маънавий муҳитни яхшилаш, ёшларни эзгу ишларга ундаш мақсадида маҳаллаларда, таълим муассасаларида кекса ва ўрта авлод вакиллари ҳамда ёшлар иштирокида «Уч авлод учрашувлари» ўтказилмоқда. Ушбу янги боғ ҳам шу мақсадга хизмат қилади.
Илгари бу жой қаровсиз, йўллари нотекис эди. Энди Алимкент кўчаси таъмирланиб, атрофи ободонлаштирилган, дарахт ва гуллар экилди, иссиқхона ва ишкомлар барпо этилган, шунингдек, ўриндиқлар, пиёда ва велосипед йўлаклари аҳолининг ҳордиқ чиқариши учун қулай шароит яратган.
Шу ерда нуронийлар, маҳалла фаоллари билан мулоқот бўлган. Улар эл-юрт фидойиларининг хотираси улуғланиб, кексаларга алоҳида ҳурмат кўрсатилаётганини таъкидлашган.
Барча ҳудудларда Нуронийлар кенгашлари ва маҳаллаларда кексалар ишлари бўйича маслаҳатчи лавозимлари ташкил қилинган. «Фахрий мураббий» ордени таъсис этилди. 3 500 нафардан зиёд юртдошларимиз «Меҳнат фахрийси» кўкрак нишони билан тақдирланган.
«Шундай замон келяптики, маҳалла ҳақиқий куч бўляпти. Масала ҳал бўлаётганини халқимиз сезяпти. Ҳамма жойга нуронийлар, хотин-қизлар ва ёшлар бўйича вакил қўйдик. Энди маҳалла раисининг «учта устуни» бор», – деди Шавкат Мирзиёев.
Президент фармонига мувофиқ, байрам арафасида Иккинчи жаҳон уруши қатнашчилари ва ногиронларининг ҳар бирига 15 миллион сўмдан бир марталик пул мукофоти ва совғалар топширилган. Туман ва шаҳар ҳокимлари фронт ортида меҳнат қилган 10 минг нафар фахрийлар билан шахсан учрашиб, ҳолидан хабар олган.
Фото
Аввалроқ Шавкат Мирзиёев Олмазор ва Яшнобод туманларидаги Иккинчи Жаҳон уруши қатнашчиларининг хонадонларида бўлгани тўғрисида хабар берилганди.
Изоҳ (0)